Spanja, festa e De La Fuente: Fituam një sfidë që mund të ishte finale

Luis De La Fuente është i lumtur që ka udhëhequr Spanjën në gjysmëfinalen e Ligës së Kombeve. Trajneri iberik vlerësoi skuadrën e tij pas ndeshjes së fituar me penallti kundër Holandës, pavarësisht vështirësive të mëdha që hasën për të kapërcyer portokallinjtë. “Emocion i madh dhe shumë vuajtje për të shijuar, një ndeshje që mund të ishte një finale. Ne pamë në rrjedhën e ndeshjes se ishte pikërisht kështu”.

“Një kombëtare e shkëlqyer nga ana tjetër, shumë e fortë. Thjesht shikoni skuadrën për të kuptuar se çfarë lloj konkurrence është kjo. Duhet t’i kushtojmë rëndësi kësaj gare të madhe”.

“Ishte një ndeshje shumë e hapur mes dy skuadrave që luajnë futboll të ngjashëm. Ne gjithmonë sulmojmë shumë. Kjo është arsyeja pse shikuesit u argëtuan kaq shumë”.