Spiro Leka, pozicion i dyfishtë me Ferrarën

Spiro Leka, trajneri shqiptar që militon prej vitesh me sukses në basketbollin italian, tanimë do ta vazhdojë bashkëpunimin e tij me klubin e Ferratës. Klubi me pronar Françesko D’Auria ka njoftuar zgjatjen shumëvjeçare të kontratës me Spiro Lekën, i cili do të mbajë dhe pozicionin e drejtorit sportiv. Pra trajner dhe drejtor sportiv i Ferrarës. Leka mbërriti në Ferrara në janar 2019 dhe ka kontribuar në mënyrë substanciale në rritjen e klubit, si në aspektin e rezultateve teknike, ashtu dhe të organizimit dhe drejtimit teknik.

Pas shpëtimit nga rënia një kategori më poshtë në sezonin e tij të parë, Leka e ka dërguar klubin e basketbollit të Ferrarës në gjysmëfinale për ngjitjen në serinë A1 të Italisë në sezonin, i cili sapo u mbyll. Zgjatja e kontratës ka për qëllim hedhjen e hapave më të mëdha përpara dhe forcimin e klubit të basketbollit në nivele të larta.

“Në fakt kemi qenë dakord për vazhdimësinë që në fundin e kampionatit dhe do të duhet të ndodhte një gjë e tillë. Kemi mbyllur të gjitha detajet e kontratës edhe duke folur me menaxherin. Kanë qenë të gjithë dakord për të vazhduar bashkëpunimin. Por gjëja kryesore është se objektivi i Klubit të Basketbollit të Ferrarës nuk ka ndryshuar. Pra do të duhet të vazhdojë rritja dhe të përpiqemi ta rendisim skuadrën në vendet e para për t’u ngjitur më pas në elitën e basketbollit italian.

Dhe në momentin që të gjithë kanë thënë se duhet të jemi më ambicioz, mbi të gjitha sponsorët kryesorë, atëherë jemi takuar lehtësisht. Jam i nderuar dhe krenar që do të vazhdojë bashkëpunimin me këtë skuadër, gjithnjë duke kërkuar më të mirën. Pavarësisht se do të kem dhe detyrën e drejtorit sportiv për mua nuk ndryshon asgjë. Përkundrazi do të vazhdojmë të rritemi të gjithë për ta çuar Ferrarën atje ku duhet”, ka thënë Spiro Leka.