Sulm me raketa ndaj aeroportit të Riadit, 12 të vdekur dhe 309 të plagosur
Një sulm i atribuar rebelëve Huthi ndaj Aeroportit Ndërkombëtar King Khalid në Riad të Arabisë Saudite ka shkaktuar 12 viktima dhe 309 të plagosur. Mes të vdekurve është edhe një shtetas amerikan, bëri të ditur të dielën Autoriteti i Përgjithshëm i Aviacionit Civil të Arabisë Saudite (GACA).
Sipas autoriteteve saudite, mes viktimave janë katër shtetas sauditë dhe tetë të huaj, përfshirë dy shtetas nga Bangladeshi dhe nga një nga SHBA-ja, Egjipti, Jordania, Siria, Palestina dhe Sudani. Disa prej të plagosurve ndodhen në gjendje kritike, ndërsa autoritetet vijojnë vlerësimin e dëmeve në aeroport.
Sipas raportimeve të Associated Press, një raketë goditi ndërtesën ku ndodhen dy terminale të përdorura për fluturimet e brendshme. Pamje të publikuara në rrjetet sociale duket se tregojnë një re tymi mbi Terminalin 3 pas sulmit.
Për shkak të goditjes, të paktën 316 fluturime drejt dhe nga aeroporti i Riadit u anuluan të shtunën, sipas të dhënave të shërbimit të gjurmimit të fluturimeve Flightradar24. Ambasada amerikane dhe disa misione të tjera diplomatike perëndimore u kanë bërë thirrje qytetarëve të shmangin aeroportin, duke paralajmëruar për ndërprerje të mëdha të udhëtimeve.
Sulmi vjen në një kohë të përshkallëzimit të luftimeve në Jemen. Qeveria jemenase, e njohur ndërkombëtarisht dhe e mbështetur nga Arabia Saudite, ka nisur një ofensivë për të rimarrë territore nga rebelët Huthi, të mbështetur nga Irani, përfshirë zona pranë ngushticës strategjike Bab el-Mandeb.
Forcat e udhëhequra nga Arabia Saudite kanë mbështetur operacionin me sulme ajrore, ndërsa Huthët janë kundërpërgjigjur me raketa dhe dronë kundër objektivave në territorin saudit.
Sponsorizuar
I pyetur nëse forcat amerikane mund t’u bashkohen sulmeve saudite kundër rebelëve, presidenti amerikan Donald Trump u shpreh se kjo mundësi po shqyrtohet.
“Mund ta bëjmë. Do ta shqyrtojmë”, u tha Trump gazetarëve.
Arabia Saudite ka udhëhequr një fushatë ushtarake kundër Huthëve që prej vitit 2015. Armiqësitë u ulën ndjeshëm pas armëpushimit të ndërmjetësuar nga OKB-ja në vitin 2022, por luftimet janë intensifikuar sërish gjatë muajve të fundit.
Përplasjet janë përqendruar edhe në zonat bregdetare të Detit të Kuq dhe pranë ngushticës Bab el-Mandeb, një korridor kyç për transportin ndërkombëtar detar. Sipas raportimit, rebelët Huthi kanë zgjeruar kontrollin në këto zona, duke rritur shqetësimet për sigurinë e lundrimit dhe përhapjen e konfliktit në rajon.