Sulmi i dështuar me dron në Leipzig, Berlini zyrtar fajëson Moskën, por përballet me kritika për reagim të butë

Zbulimi i një droni të pajisur me eksploziv dhe mekanizëm shpërthyes pranë avioneve të mallrave ukrainas “Antonov” në Aeroportin e Leipzigut, ka ndezur një debat të ashpër politik në Gjermani mbi kufijtë e “luftës hibride” ruse. Qendra logjistike e Leipzigut shërben si një pikë kyçe për transportin e ndihmave ushtarake drejt Kievit, çka do ta bënte goditjen potenciale një ngjarje me pasoja të rënda.

Pas hezitimeve fillestare, Gjermania konfirmoi zyrtarisht të martën se pas kësaj tentative sabotazhi qëndron Moska. Ministri i Brendshëm Federal, Alexander Dobrindt, deklaroi se droni dhe teknologjia e përdorur kërkonin “një shkallë të lartë ekspertize teknike dhe përpjekje të konsiderueshme organizative”, ndërsa mjetet e përdorura përputheshin me operacionet e mëparshme hibride të inteligjencës ruse.

Masat e Berlinit dhe reagimet e ashpra të opozitës

Si përgjigje ndaj incidentit, qeveria gjermane njoftoi mbylljen e Shtëpisë Ruse në Berlin — e dyshuar për spiunazh — si dhe mbylljen e Konsullatës së Përgjithshme Ruse në Bon, krahas paralajmërimeve për shtrëngimin e vizave dhe masave ndaj “flotës në hije” ruse. Ndërkohë, Kancelari Friedrich Merz ka zgjedhur të mos komentojë drejtpërdrejt, edhe pse më herët pati premtuar se “autorët e sulmeve hibride do të paguajnë një çmim”.

Këto masa janë cilësuar si krejtësisht të pamjaftueshme nga forcat politike gjermane.

Partia e Të Gjelbërve

Zëdhënësja për sigurinë, Sara Nanni, kritikon vonesën e reagimit shtetëror: “Analiza e qeverisë federale erdhi pak vonë dhe hapat që po ndërmerr nuk janë të mjaftueshëm për mua. Nuk mendoj se dikush në Moskë ka frikë ose e mendon dy herë tani.”

Nanni shton se ky incident ishte një “akt terrorist i tentuar” dhe se “Rusia po përgatitet për një luftë jo vetëm kundër Ukrainës, por kundër të gjithë Evropës”.

Blloku Konservator (CDU)

Eksperti i sigurisë, Roderich Kiesewetter, i bëri thirrje qeverisë të braktisë “rrugën politikisht të përshtatshme të paqësimit”, duke kërkuar dërgimin e raketave kruiz “Taurus” në Ukrainë dhe aktivizimin e Nenit 4 të Traktatit të NATO-s për konsultime urgjente aleate.

Nga ana tjetër, Presidenti rus Vladimir Putin i hodhi poshtë akuzat duke i quajtur sanksionet gjermane një “gabim serioz” dhe duke akuzuar Berlinin për falsifikim provash.

A është Gjermania në luftë?

Përballë pikëpyetjeve në rritje, autoritetet gjermane refuzojnë prerazi idenë se vendi ndodhet zyrtarisht në konflikt të armatosur. Ministri i Brendshëm Dobrindt theksoi: “Ne nuk jemi në luftë, por jemi shënjestra e përditshme e luftës hibride”, qëndrim ky i mbështetur edhe nga Ministri i Jashtëm Johann Wadephul, sipas të cilit Gjermania është vetëm një “objektiv lufte” rus.

Në aspektin kushtetues dhe ligjor, eksperti i sigurisë Sönke Marahrens shpjegon se Gjermania nuk konsiderohet në luftë pasi mungon një sulm i drejtpërdrejtë fizik apo një deklaratë zyrtare nga Bundestagu. Megjithatë, Marahrens nënvizon se përmes akteve të tilla hibride, Rusia synon të ndikojë te opinioni publik gjerman për të zbehur mbështetjen ushtarake ndaj Ukrainës.

Faktori politik i brendshëm dhe zgjedhjet në Saksoni-Anhalt

Heshtja ose reagimi i matur i koalicionit CDU/CSU dhe SPD lidhet gjithashtu me klimën e ndjeshme politike përpara zgjedhjeve shtetërore në Saksoni-Anhalt. Partia e e djathtë e skajshme “Alternativa për Gjermaninë” (AfD), e cila udhëheq sondazhet, kundërshton ndihmat ushtarake për Ukrainën dhe kërkon normalizimin e marrëdhënieve me Moskën. Nxitja e një retorike lufte nga qeveria qendrore rrezikon të rrisë mbështetjen elektorale për AfD-në, duke e vendosur Berlinin përpara një dileme të dyfishtë të sigurisë së jashtme dhe stabilitetit të brendshëm.

/rtsh.al/