TEL AVIV – Ushtria izraelite tërhiqet nga korridori Netzarim në Rripin e Gazës

GAZË/TEL AVIV, 9 shkurt /ATSH-DPA/- Pas shkëmbimit të fundit të pengjeve izraelite me të burgosurit palestinezë sipas marrëveshjes aktuale të armëpushimit midis Izraelit dhe Hamasit, ushtria izraelite është tërhequr nga korridori strategjik Netzarim në Rripin e Gazës, sipas raporteve të mediave.

Ky korridor ndan brezin bregdetar në gjysmën veriore dhe jugore. Radioja e ushtrisë izraelite raportoi se ushtria ishte larguar plotësisht nga zona, megjithëse nuk kishte asnjë konfirmim zyrtar në atë kohë.

Burimet izraelite të sigurisë deklaruan se po përgatiteshin për zbatimin e marrëveshjes.

Izraeli tashmë ka filluar të tërhiqej nga disa pjesë të korridorit Netzarim pas hyrjes në fuqi të armëpushimit me Hamasin.

Sipas marrëveshjes, ushtria pritej të lironte tërësisht zonën, me përjashtim të një brezi të gjerë një kilometër përgjatë kufirit izraelit.

Kjo tërheqje ka për qëllim të lehtësojë kthimin e palestinezëve të zhvendosur nga jugu në qytetet e tyre veriore të shkatërruara.

Ndërkohë, të afërmit e pengjeve që ende mbahen në Gazë kanë akuzuar qeverinë e Izraelit për mungesë vendosmërie në negociatat e vazhdueshme për armëpushim me Hamasin.

Ata kritikuan mandatin e kufizuar që iu dha delegacionit izraelit të dërguar në Katar dhe paralajmëruan për rrezikun e rifillimit  të luftës.

Marrëveshja e armëpushimit trefazore që hyri në fuqi më 19 janar – synon të arrijë një fund të përhershëm të luftimeve dhe lirimin e të gjithë pengjeve që ende mbahen nga milicia e Hamasit e mbështetur nga Irani dhe aleatët e tyre ekstremistë.

Gjatë kësaj faze fillestare gjashtëjavore, 33 pengje izraelite do të lirohen në këmbim të 1904 të burgosurve palestinezë të mbajtur në burgjet izraelite.

Hamasi tha se tetë nga 33 pengjet në listë janë raportuar të vdekur. Është e paqartë se kush janë saktësisht. //a.i/