Tarifë e re energjie për makinat elektrike, taksitë në protestë: Do të ndjekim rrugët ligjore

Enti Rregullator i Energjisë ka vendosur një tarifë të re për energjinë elektrike në stacionet e karikimit të makinave elektrike, e cila do të aplikohet prej 1 nëntorit. Tarifa e re do të jetë 22 lekë/kWh dhe 25.3 lekë/kWh në orët e pikut 18:00-23:00.

Për përdoruesit e makinave elektrike dhe taksitë kjo nënkupton në kosto të shtuar. Xhevit Bara, një nga përfaqësuesit e Sindikatës së Taksive, shpjegon në programin “Aldo Morning Show” në Tv Klan cili është dëmi konkret që pësojnë.

Xhevit Bara: Në qoftë se dje merrje një qytetar për ta çuar nga këtu ku jemi, te ETC dhe e çoje në qendër, 300 lekë rruga, ti harxhoje 100 lekë energji elektrike dhe nxirrje 200 lekë. Ky përkthehet në taksa dhe në fitimin e familjes tënde. Më datë 1, nuk do ta marrësh më këtë 200 lekëshin se do të shkojë 200 lekë korrenti dhe nuk e merr.

Aldo: Ose rrit çmimin.

Xhevit Bara: Nuk mund ta rrisësh çmimin sepse çmimi është atribut ligjor i Këshillit Bashkiak të Tiranës.

Bara e konkretizon shpjegimin e tij për kostot e taksie me disa shifra të thjeshta.

Xhevit Bara: Në qoftë se dje një taksi me një mesatare, fitoje në 10 rrugë nga 1 mijë lekë, 10 mijë lekë. Në datën 1 ka për të fituar 8 mijë lekë sepse do t’i hajë energjia më shpejt sesa më 31.

Të premten, në orën 12:00 do të ketë një manifestim nga kompanitë e taksive.

Xhevit Bara: Ne do të ndjekim rrugët ligjore, nuk kemi si të pajtohemi kështu. Sindikata nuk është kundër normave e ligjeve. Do të bëjmë të gjitha tentativat që na lejon ligji, që dje kanë çuar shkresat zyrtare dhe do të shkojmë te protesta, do të jenë të padhunshme.