Tentuan t’i fusnin në Shqipëri pa i deklaruar, sekuestrohen 2 ora “Rolex” dhe 351 cigare puro në Portin e Durrësit

Dy ora dore me mbishkrimin “Rolex” dhe 351 cigare puro të markave të ndryshme, të ndara në 36 kuti dhe të padeklaruara, janë konstatuar gjatë një kontrolli në Portin e Durrësit.

Mallrat u zbuluan nga shërbimet e Doganës dhe Policisë Kufitare gjatë kontrollit të një automjeti që tentonte të hynte në vend. Pas verifikimeve, ato u sekuestruan nga autoritetet.

Njoftimi:

Strukturat e Doganës Shqiptare, në bashkëpunim me Policinë Kufitare, kanë evidentuar një rast të mosdeklarimit të mallrave gjatë kontrollit të një mjeti në Portin e Durrësit.

Gjatë kontrollit u konstatuan:

2 ora dore me mbishkrimin “ROLEX”

351 cigare puro, të markave të ndryshme, të ndara në 36 kuti

Dogana Shqiptare vijon kontrollet dhe bashkëpunimin ndërinstitucional me Policinë e Shtetit, për parandalimin dhe evidentimin e rasteve të mosdeklarimit dhe shkeljeve të legjislacionit doganor.