Tirana, gati për titull kampion

Tirana është vetëm një hap larg titullit kampion në volejboll për femra, një trofe që mungon prej gati 12 vitesh në skuadrën bardheblu. Vajzat e Adrian Gorencës kanë fituar dhe finalen e dytë për titull kampion ndaj Skënderbeut, 3-1 në Pallatin e Sportit në Farkë, ndërsa tanimë kryeson 2-0.

Me mungesa për shkak të aksidentit të së shtunës, Skënderbeu i Orlando Kojës është munduar të bëjë rezistencë. 25-21, 25-13 dy sete njëherazi për Tiranën. Ndryshon diçka në lojë Skënderbeu, që fiton setin e tretë 25-21. Mirëpo Tirana nuk lëshon më dhe 25-17 e 3-1.

Në përfundim të ndeshjes ka patur probleme dhe Moulla, e cila ka kaluar në një gjendje të vështirë pas lojës, ndërsa është përmirësuar vetëm falë ndërhyrjes së fizioterapistit të Tiranës, Sabahat Kastrati.

Finalja e tretë për titull kampion luhet të premten në Pallatin e Sportit “Tamara Nikolla” në Korçë në ora 17:00.