Tiranë / Goditen 6 lokale të basteve sportive / 8 persona të arrestuar

Policia ka goditur sot 6 lokale në zona të ndryshme të Tiranës, pranë shkollave, ku viheshin baste sportive në mënyrë të paligjshme përmes celularëve.
Operacioni i koduar “Barriera” përfundoi me 8 persona të arrestuar.

Në pranga u vunë M. M., 20 vjeç dhe S. A., 23 vjeç, të dy punonjës në dy prej lokaleve të kontrolluara. Po ashtu, u arrestuan D. V., 24 vjeç, B. Ç., 42 vjeç, E. S., 43 vjeç, A. D., 26 vjeç, E. B., 24 vjeç dhe O. A., 21 vjeç, të cilët u kapën në ambientet e lokaleve duke vënë baste.

Gjatë kontrolleve u sekuestruan nëntë celularë me faqe aktive për lojëra fati, si dhe pajisja ku ruheshin pamjet e kamerave të sigurisë.

Operacioni u zhvillua nga Seksioni për Hetimin e Mashtrimeve Kibernetike, në bashkëpunim me Komisariatin Nr. 2 dhe Forcën e Posaçme Operacionale dhe në koordinim me Prokurorinë.
Hetimet dhe kontrollet vijojnë për të identifikuar persona të tjerë që mund të jenë përfshirë në këtë aktivitet të paligjshëm.