Trazira në Ceuta, përleshje mes banorëve dhe emigrantëve marokenë

Situata në enklavën spanjolle të Ceutës ka dalë jashtë kontrollit pas përleshjeve të ashpra mes banorëve vendas dhe emigrantëve.

Protestuesit u kanë vënë flakën disa strukturave të improvizuara ku qëndronin emigrantë, ndërsa kanë bllokuar edhe kalimin e kamionëve të Kryqit të Kuq që transportonin ushqime dhe ndihma për personat e strehuar në zonë.

Policia spanjolle ndërhyri për të ndarë grupet dhe për të shpërndarë protestuesit. Përplasjet u shoqëruan me tensione të forta, ndërsa autoritetet kanë bërë thirrje për qetësi dhe ndalimin e dhunës.

Protestat shpërthyen pas pakënaqësisë së banorëve për praninë e mijëra emigrantëve, të cilët prej javësh po qëndrojnë në rrugë dhe plazhe për shkak të mungesës së hapësirave të strehimit.

Tensionet u përshkallëzuan edhe më tej pasi, sipas autoriteteve, disa emigrantë hodhën gurë drejt një automjeti ushtarak, duke plagosur katër ushtarë spanjollë.

Ministri i Brendshëm i Spanjës bëri thirrje për qetësi dhe kërkoi ndalimin e çdo forme dhune, ndërsa akuzoi retorikën politike për nxitjen e urrejtjes ndaj emigrantëve.

Ceuta po përballet prej javësh me presion të lartë emigrator. Në muajin korrik, më shumë se 72 mijë emigrantë kaluan nga Maroku drejt territorit spanjoll, ndërsa shumica e tyre janë kthyer.

Qendra e pritjes është e mbingarkuar, duke detyruar shumë emigrantë të qëndrojnë përkohësisht në hapësira publike dhe përgjatë plazheve.

Situata mbetet e tensionuar, ndërsa autoritetet përballen njëkohësisht me krizën humanitare, presionin emigrator dhe shqetësimet në rritje për sigurinë.

/rtsh.al/