Trump ironizon protestat e dhunshme në Francë: Le të shkojmë të bashkohemi me revolucionin
Presidenti amerikan Donald Trump ironizoi protestat e dhunshme që kanë përfshirë Francën, ku demonstratat kundër rritjes së kostos së jetesës u shoqëruan me përplasje mes policisë dhe protestuesve, grabitje dhe zjarre.
“Le të shkojmë në Francë! Është një vend i mrekullueshëm. Pa trazira, pa revolucione. Franca duket se është vendi ideal për revolucione. Është e pabesueshme. Le të shkojmë në Francë dhe t’i bashkohemi revolucionit”, deklaroi Trump me ironi.
VIDEO- Trump ironizon protestat në Francë
Komentet e tij erdhën pasi Franca u zgjua të dielën me rrugë të dëmtuara dhe pasoja të rënda nga protestat e së shtunës. Demonstratat pasuan disa javë protestash studentore dhe zhvillohen rreth gjashtë muaj para zgjedhjeve për zëvendësimin e presidentit Emmanuel Macron.
Edhe zëvendëspresidenti amerikan JD Vance reagoi përmes një postimi në rrjetin social X, duke fajësuar politikat e emigracionit dhe duke ngritur çështjen e integrimit të emigrantëve në shoqëritë perëndimore. “Liberalët perëndimorë importuan botën e tretë në Francë dhe vende të tjera në emër të diversitetit dhe dhembshurisë”, shkroi Vance, duke pretenduar se autoritetet kishin shpërfillur pyetjet themelore mbi integrimin dhe përputhshmërinë kulturore.
Vance u shpreh gjithashtu se shpresonte që Franca të ndalte dhunën përpara se të dëmtoheshin më shumë monumente dhe u bëri thirrje amerikanëve të merrnin parasysh atë që po ndodh në Evropë. Ndërkohë, Ministria e Brendshme franceze vlerësoi se në protesta morën pjesë rreth 550 mijë persona, ndërsa sindikata CGT deklaroi se numri arriti në 800 mijë.