UKRAINË – Qeveria riorganizon kabinetin pas dorëheqjes së disa ministrave

KIEV, 3 shtator /ATSH-DPA/- Ukraina pritet të riorganizojë kabinetin pasi disa ministra dhanë dorëheqjen.

“Kërkesat e tyre do të shqyrtohen në seancën e ardhshme parlamentare”, shkroi sot në Facebook kryetari i parlamentit Ruslan Stefanchuk.

Ministrat në fjalë janë Olexander Kamyshin, i cili është përgjegjës për industrinë e mbrojtjes, ministri i Drejtësisë Denys Maliuska dhe ministri i Mjedisit Ruslan Strilets.

Vitaly Koval, kreu i Fondit të Pronës Shtetërore përgjegjës për privatizimin, gjithashtu kërkon të largohet nga detyra.

Dorëheqjet e nënkryetareve të qeverisë Olha Stefanishyna dhe Iryna Vereshchuk u njoftuan sot në mbrëmje. Vereshchuk është përgjegjëse për çështjet e refugjatëve, ndërsa Stefanishyna është përgjegjëse për integrimin evropian të Ukrainës.

Kreu i grupit parlamentar të partisë presidenciale Shërbëtorët e Popullit, David Arakhamia, njoftoi se do të bëhen ndryshime të tjera në kabinet.

Sipas Arakhamia, do të ketë emërime të reja në më shumë se gjysmën e të gjitha ministrive.

Lista përfundimtare do të shpallet në mbledhjen e grupit parlamentar të mërkurën.

Ndërkohë, kreu i operatorit të rrjetit elektrik “Ukrenergo” do të duhet gjithashtu të zëvendësohet – pas raporteve se kreu i tij Volodymyr Kudrytskyi ishte shkarkuar nga bordi i drejtorëve të kompanisë shtetërore.

Kudrytskyi drejtoi “Ukrenergo” që nga viti 2020, por kohët e fundit u fajësua për masat joadekuate mbrojtëse për nënstacionet e vendit kundër sulmeve me dron dhe raketa ruse.

Që nga sulmi masiv me raketa dhe dron rus në infrastrukturën energjetike të Ukrainës në fillim të javës së kaluar, Ukraina ka përjetuar sërish ndërprerje të paplanifikuara të energjisë.

Ukraina ka më shumë se dy vjet e gjysmë që po mbrohet nga pushtimi rus.

Qeveria nën drejtimin e kryeministrit Denys Shmyhal ka qenë në detyrë që nga marsi i 2020. //a.i/