Ukraina sulm masiv me dronë ndaj Rusisë, katër viktima dhe dhjetëra të plagosur

Një nga sulmet më të mëdha me dronë të ndërmarra nga Ukraina që nga fillimi i luftës ka goditur disa rajone të Rusisë, përfshirë edhe zonën e Moskës, duke lënë të paktën katër viktima dhe dhjetëra të plagosur.

Sipas Ministrisë ruse të Mbrojtjes, gjatë natës Ukraina lëshoi afro 600 dronë drejt 14 rajoneve ruse, si dhe drejt Krimesë dhe zonave të Detit të Zi dhe Azov. Autoritetet thanë se mbrojtja ajrore ruse rrëzoi 556 dronë dhe neutralizoi edhe 30 të tjerë pas agimit.

Rajoni i Moskës ishte ndër më të goditurit. Guvernatori Andrei Vorobyov deklaroi se një grua humbi jetën pasi një dron goditi një banesë në Khimki, në veri të kryeqytetit rus. Dy persona të tjerë u vranë në fshatin Pogorelki, kur mbetjet e një droni ranë mbi një kantier ndërtimi.

“Që nga ora 03:00 e mëngjesit, sistemet e mbrojtjes ajrore po zmbrapsin një sulm në shkallë të gjerë ndaj rajonit të kryeqytetit”, tha Vorobyov, duke shtuar se ekipet e emergjencës vazhdojnë kërkimet nën rrënoja.

Një tjetër viktimë u raportua në rajonin kufitar të Belgorodit. Ndërkohë, kryebashkiaku i Moskës, Sergei Sobyanin, bëri të ditur se mbi 80 dronë u interceptuan mbi kryeqytet dhe se të paktën 12 persona mbetën të plagosur.

Një nga sulmet goditi një zonë pranë rafinerisë së naftës dhe gazit në Moskë, duke dëmtuar disa shtëpi dhe plagosur punëtorë ndërtimi. Megjithatë, Sobyanin tha se aktiviteti i rafinerisë nuk u ndërpre.

Presidenti ukrainas, Volodymyr Zelenskyy, konfirmoi sulmet dhe tha se dronët kishin përshkuar më shumë se 500 kilometra për të arritur objektivat në territorin rus.

“Reagimi ynë ndaj vazhdimit të luftës nga Rusia dhe sulmeve ndaj qyteteve tona është plotësisht i justifikuar”, deklaroi Zelensky. Ai shtoi se Ukraina po demonstron se edhe rajonet më të mbrojtura të Rusisë nuk janë të paprekshme.

Shërbimi ukrainas i sigurisë SBU pretendoi se gjatë operacionit u goditën një rafineri nafte dhe dy stacione pompimi pranë Moskës, objektiva që sipas Kievit kanë rëndësi strategjike për furnizimin ushtarak rus.

Ndërkohë, aeroporti Sheremetyevo në Moskë raportoi se mbetje dronësh ranë brenda perimetrit të tij, pa shkaktuar dëme të mëdha apo ndërprerje serioze të fluturimeve.

Sulmet me dronë ndaj rajonit të Moskës janë intensifikuar muajt e fundit, ndërsa lufta mes Rusisë dhe Ukrainës vijon të hyjë në një fazë gjithnjë e më të ashpër dhe të paparashikueshme.

/rtsh.al/