Ushqimet që ndihmojnë në mbrojtjen e shëndetit të kockave

LONDËR, 31 korrik /ATSH/ – Shëndeti i kockave fillon të bjerë më herët nga sa mendohet, por një regjim ushqimor i pasur me lëndë ushqyese të rëndësishme mund të ndihmojë në ruajtjen e densitetit të tyre dhe në uljen e rrezikut të osteoporozës dhe frakturave, sipas një analize të publikuar nga BBC Future.

Ekspertët theksojnë se nuk mjafton vetëm konsumimi i qumështit. Për të mbajtur kockat të forta nevojitet një kombinim i kalciumit, vitaminës D, proteinave, magnezit dhe vitaminës K, të shoqëruara me aktivitet fizik të rregullt.

Produktet e bulmetit, si qumështi, kosi dhe djathi, mbeten ndër burimet më të mira të kalciumit. Alternativa të mira janë edhe tofu i pasuruar me kalcium, peshqit që konsumohen me kocka, si sardelet dhe salmoni i konservuar, si edhe perimet me gjethe jeshile.

Vitamina D, e domosdoshme për përthithjen e kalciumit, merret nga ekspozimi i moderuar në diell dhe nga ushqime si peshku i yndyrshëm, vezët dhe produktet e pasuruara.

Proteinat luajnë gjithashtu një rol të rëndësishëm në ndërtimin dhe mirëmbajtjen e masës kockore. Burime të mira janë mishi pa dhjamë, peshku, vezët, bishtajoret dhe produktet e sojës.

Studiuesit theksojnë se dieta mesdhetare, e pasur me fruta, perime, drithëra integrale, arra, fara, vaj ulliri dhe peshk, lidhet me një shëndet më të mirë të kockave dhe një rrezik më të ulët për fraktura. Gjithashtu, kufizimi i ushqimeve ultra të përpunuara, alkoolit dhe duhanit ndihmon në ruajtjen e densitetit kockor.

Specialistët nënvizojnë se aktiviteti fizik, veçanërisht ushtrimet me peshë dhe ato të forcës, është po aq i rëndësishëm sa ushqimi për të ngadalësuar humbjen e masës kockore me kalimin e viteve.