VARSHAVË – Tusk: Kompensimi për viktimat naziste në Poloni do të paguhet së shpejti

VARSHAVË, 2 korrik /ATSH-DPA/ – Dëmshpërblimi i shpallur nga kancelari gjerman Olaf Scholz për viktimat e pushtimit nazist në Poloni gjatë Luftës së Dytë Botërore do të fillojë të shpërndahet së shpejti, sipas kryeministrit polak Donald Tusk.

“Kjo nuk është çështje vitesh, por muajsh”, tha Tusk në Varshavë pas konsultimeve të qeverisë gjermano-polake që përfshinin ministra nga të dyja palët.

Scholz premtoi kompensim për rreth 40 000 viktimat e pushtimit gjerman të Polonisë që janë ende gjallë, por nuk tha se kur dhe sa kompensim do të paguhej.

Tusk e përshkroi njoftimin e Scholz si një hap në drejtimin e duhur.

“Nuk ka asnjë shumë parash që do të kompensonte gjithçka që ndodhi gjatë Luftës së Dytë Botërore”, tha ai.

“Në kontekstin formal dhe ligjor çështja e dëmshpërblimeve është mbyllur”, tha Tusk.

“Megjithatë, ndihma e premtuar nga qeveria gjermane për viktimat e pushtimit gjerman mund të shërbejë për të përmirësuar marrëdhëniet gjermano-polake, pasi gjestet e mira janë gjithashtu shumë të rëndësishme në politikë”, shtoi ai.

Qeveria e mëparshme konservatore nacionaliste e Partisë Ligj dhe Drejtësi (PiS) kishte kërkuar dëmshpërblime me vlerë 1,3 trilionë euro (1,39 trilionë dollarë).

Që nga ndryshimi i qeverisë në Poloni në dhjetor, toni ndaj Gjermanisë është bërë më miqësor.

Tusk tha se angazhimi i Gjermanisë për sigurinë në Evropë është aktualisht një çështje kyçe.

“Për mua është e rëndësishme që Gjermania të jetë e përgatitur të marrë përsipër një përgjegjësi shumë më të madhe për sigurinë e kontinentit, për të siguruar që nuk do të ketë luftë në Evropë”, tha ai. //a.i/