VIDEO/ Bombë në makinë, vritet gjenerali rus në Moskë

Një gjeneral rus u vra mëngjesin e kësaj të hëne, pasi një pajisje shpërthyese shpërtheu nën makinën e tij në Moskë, ndërsa hetuesit kanë deklaruar se pas sulmit mund të jetë Ukraina, duke bërë kështu këtë rast të tretin të vrasjes së një oficeri të lartë ushtarak brenda një viti.

Lajmi u konfirmua nga Svetlana Petrenko, zëdhënëse e Komitetit Hetimor të Rusisë, agjencisë kryesore të hetimeve penale në vend.

Ajo tha se gjenerali Fanil Sarvarov, kreu i Drejtorisë së Trajnimit Operativ të Forcave të Armatosura të Rusisë, vdiq nga plagët e marra.

“Hulumtuesit po ndjekin shumë pista lidhur me këtë vrasje. Njëra prej tyre është se krimi është orkestruar nga shërbimet e inteligjencës ukrainase,” tha Petrenko, citon AP.

Pak më shumë se një vit më parë, më 17 dhjetor 2024, gjenerali Igor Kirillov, kreu i forcave për mbrojtje bërthamore, biologjike dhe kimike, u vra nga një bombë e fshehur në një skuter elektrik jashtë ndërtesës së tij. Asistenti i Kirillovit gjithashtu humbi jetën. Shërbimi i sigurisë së Ukrainës mori përgjegjësinë për sulmin.

Një shtetas uzbek u arrestua shpejt dhe u akuzua për vrasjen e Kirillovit në emër të shërbimit të sigurisë ukrainas.

Moska gjithashtu ka fajësuar Ukrainën për disa shpërthime dhe sulme të tjera në territorin rus.