VIDEO/ Kaos dhe grushte në Parlamentin e Armenisë, thirret autoambulanca
ARMENI- Një seancë e Parlamentit të Armenisë u shndërrua në përleshje fizike të enjten, ku deputetët shkëmbyen grushte, hodhën karrige dhe përmbysën tavolina. Disa ligjvënës mbetën të lënduar, ndërsa ndërhyrja e forcave të sigurisë u bë e domosdoshme për të qetësuar situatën.
Përplasja ndodhi mes deputetëve të partisë në pushtet, “Kontrata Civile”, të kryeministrit Nikol Pashinyan, dhe opozitës “Armenia e Fortë”, gjatë debatit për një emërim në Dhomën e Auditimit, institucion që mbikëqyr shpenzimet publike.
Tensionet nisën pas akuzave për korrupsion dhe komenteve personale ndaj familjes së një përfaqësuesi të opozitës. Debati u përshkallëzua shpejt në dhunë, ndërsa disa deputetë u panë duke goditur dhe shtyrë njëri-tjetrin. Për shkak të lëndimeve, në Parlament u thirr edhe një autoambulancë.
WATCH: A mass brawl erupted in Armenia’s parliament on October 29 between ruling party and opposition lawmakers.
The clash began after a ruling party MP mocked opposition leader Narek Karapetyan’s family over a proposal to establish a “ministry to satisfy all women.” https://t.co/EKhCpyHedW
— Clash Report (@clashreport) October 29, 2026
Kryetari i Parlamentit, Ruben Rubinyan, fillimisht refuzoi të ndërpriste seancën, duke deklaruar se dëshironte që publiku ta shihte situatën.
Vetëm pas më shumë se 10 minutash përleshje ai shpalli pushim dhe kërkoi ndërhyrjen e sigurisë parlamentare. Ky është incidenti i dytë i dhunshëm mes pozitës dhe opozitës brenda pak javësh. Më 6 tetor, një tjetër përplasje kishte detyruar ndërprerjen e seancës parlamentare.
Ngjarja e fundit ka ngritur pikëpyetje mbi efektivitetin e rregullave të reja të etikës parlamentare, të miratuara në fillim të tetorit për të garantuar respektin mes deputetëve dhe për të parandaluar sjelljet e dhunshme në Kuvend./abcnews.al