Vendet e fuqishme perëndimore akuzojnë Izraelin për “vrasje çnjerëzore të civilëve që presin në radhë për ushqim”

Izraeli ka nisur një ofensivë masive tokësore në Deir al-Balah, në zemër të Rripit të Gazës, duke shpërfillur thirrjet ndërkombëtare për t’i dhënë fund luftimeve. Ky veprim ka ngjallur shqetësim të madh, me Ministrin e Jashtëm italian, Antonio Tajani, i cili paralajmëroi se po rrezikohen edhe jetët e punonjësve italianë dhe të Kombeve të Bashkuara në zonë. Italia, së bashku me 24 vende të tjera, ka nënshkruar një deklaratë të përbashkët duke kërkuar ndërprerjen e menjëhershme të luftës.

Ministri Tajani theksoi se po e ndjek personalisht situatën dhe ka kërkuar me ngulm që sulmet të ndalen menjëherë.

Deklarata e përbashkët, e nënshkruar nga 25 vende mes të cilave Mbretëria e Bashkuar, Australia, Kanadaja, Franca, Gjermania, dhe Japonia, dënon “vuajtjet e civilëve në Gaza që kanë arritur nivele të papara”.

Dokumenti kritikon ashpër shpërndarjen e ndihmës, duke e quajtur atë të rrezikshme dhe duke dënuar “vrasjen çnjerëzore të civilëve” që presin në radhë për ushqim dhe ujë, pas një incidenti me mbi 90 viktima.

“Modeli i shpërndarjes së ndihmës i qeverisë izraelite është i rrezikshëm, nxit paqëndrueshmërinë dhe i privon banorët e Gazës nga dinjiteti njerëzor. Ne dënojmë shpërndarjen e ndihmës me pikatore dhe vrasjen çnjerëzore të civilëve, përfshirë fëmijët, duke u përpjekur të përmbushin nevojat e tyre më themelore, të tilla si uji dhe ushqimi”, thuhet në deklaratë, ndër të tjera, pas një masakre tjetër të civilëve që presin në radhë për ndihmë, me mbi 90 të vdekur në më të përgjakshmen që nga fillimi i konfliktit. Këto incidente përshkruhen nga 25 vendet si “të tmerrshme”.

Situata humanitare është gjithnjë e më e rëndë.  Vetëm në orët e fundit, të paktën 19 palestinezë kanë vdekur nga uria, përfshirë një vajzë katërvjeçare. Caritas paralajmëron për rrezikun e urisë, ndërsa OKB-ja raporton një rritje prej 40% të çmimeve të ushqimeve dhe paralajmëron se ndihma e saj, e bllokuar jashtë Rripit të Gazës, mund të ushqejë popullsinë për “tre muaj”.

Megjithatë, Ministria e Jashtme izraelite e hodhi poshtë deklaratën, duke e cilësuar “jashtë realitetit” dhe duke thënë se i dërgon mesazhin e gabuar Hamasit. Në një deklaratë të postuar në rrjetin social X, Izraeli argumentoi se Hamasi është “pala e vetme përgjegjëse” për luftën dhe mungesën e një marrëveshjeje për lirimin e pengjeve.

“Ekziston një propozim konkret për një marrëveshje armëpushimi: Izraeli i ka thënë vazhdimisht po këtij propozimi, ndërsa Hamasi refuzon me kokëfortësi ta pranojë atë,” thuhet në deklaratë, e cila i bën thirrje komunitetit ndërkombëtar të shmangë deklaratat e tilla gjatë negociatave.

Ndërkohë, bilanci i viktimave në Gaza po rëndohet: numri i përgjithshëm i të vdekurve i afrohet 60,000 palestinezëve, me mbi 130 viktima në 24 orët e fundit. Situata humanitare është përkeqësuar ndjeshëm, me të paktën 19 palestinezë që kanë vdekur nga uria, përfshirë një vajzë katërvjeçare.

Në një zhvillim tjetër, në Bruksel, dy ushtarë izraelitë janë ndaluar dhe marrë në pyetje nën dyshimin për kryerjen e krimeve të luftës, gjenocid, torturë dhe zhvendosje të detyruar. Kjo ndodhi pas një ankese të depozituar nga Fondacioni Hind Rajab dhe Rrjeti Global i Veprimit Ligjor (GLAN). ANSA

/rtsh.al/