Virusi i gripit të shpendëve, zbulohet për herë të parë te një ari polar në Europë

Virusi i gripit të shpendëve është zbuluar te një ari polar i ngordhur në arkipelagun arktik të Svalbard, në atë që konsiderohet rasti i parë i konfirmuar te një gjitar në Europë.

Lajmi është bërë i ditur nga Instituti Veterinar Norvegjez, i cili njoftoi gjithashtu se virusi është identifikuar edhe te një mors i ngordhur në të njëjtën zonë.

Arkipelagu i Svalbard ndodhet në Oqeanin Arktik, mes Polit të Veriut dhe Europës kontinentale dhe konsiderohet një nga habitatet më të rëndësishme për speciet e egra të rajonit polar.

Sipas ekspertëve, zbulimi i virusit te gjitarët rrit shqetësimet për përhapjen e gripit të shpendëve përtej popullatave të shpendëve të egër, pasi virusi shumë ngjitës po identifikohet gjithnjë e më shpesh edhe te kafshët gjitare në vende të ndryshme të Europës.