Von der Leyen thirrje për një Europë të bashkuar: Duhet vepruar për Ukrainën dhe Ballkanin Perëndimor

Presidentja e Komisionit Evropian, Ursula von der Leyen, ka bërë thirrje për një Europë të bashkuar gjatë fjalës së saj pas vlerësimit me Çmimin Ndërkombëtar të Karlit të Madh.

Von der Leyen tha se e ardhmja e Europës mund të ndërtohet vetëm duke u mbështetur mbi të kaluarën e saj, teksa theksoi se Unioni ndodhet në një moment historik që duhet shfrytëzuar për anëtarësimin e Ukrainës dhe vendeve të Ballkanit Perëndimor.

“Ky çmim, ky qytet, janë simbol i një Europe të bashkuar. Ka kaq shumë gjëra që dëshmojnë për kulturën dhe historinë tonë, për bukurinë e jashtëzakonshme të Europës dhe për luftërat tona tragjike, për rilindjet tona të shumta dhe për ringjalljen tonë nga hiri pas dy luftërave botërore të tmerrshme. Mrekullia e Europës – ribashkimi i fatit dhe historisë së popujve është e shkruar në këtë qytet. Kushdo që sheh Palatine Chapel ndjen se kjo forcë është mbledhur pikërisht këtu. Çfarë vendi. Çfarë force. Katedralja është një dëshmi e jashtëzakonshme e rilindjes shpirtërore, kulturore dhe politike të Europës, e nxitur nga vizioni i Karlit të Madh.

Ideja e tij për Evropën ishte të krijonte një hapësirë, ku shkenca dhe kultura, arsimi dhe sundimi i ligjit mund të zhvilloheshin – një vend ku njerëzit përpiqen për dije dhe vlera të përbashkëta. Ai ishte i bindur se e ardhmja e Europës ndërtohej mbi të kaluarën e saj – ashtu si Kapela (kishëza) e frymëzuar nga arti bizantin, romak dhe klasik, por e formësuar për një epokë të re. Ashtu siç edhe e ardhmja jonë do të mbështetet gjithmonë mbi të kaluarën – mbi kulturën dhe dijen, historinë dhe vlerat. Po, ky është një moment historik dhe nuk duhet ta lëmë të kalojë pa vepruar. Duhet të përballemi me këtë sfidë për Ukrainën, për Ballkanin Perëndimor. Jam shumë e lumtur që mirëpres këtu Edi Ramën, Kryeministrin e Shqipërisë. Kjo është një shenjë gjithashtu për Republikën e Moldavisë dhe, shpresoj, edhe për Gjeorgjinë – për të gjithë ata që kanë vendosur në favor të një të ardhmeje të lirë dhe paqësore në Bashkimin tonë, për një Evropë më të fortë dhe më të pavarur”, tha von der Leyen.

Presidentja e Komisionit Evropian theksoi nevojë për forcimin e demokracisë, pasi tha se të gjitha demokracitë janë nën sulm “nga armiq të jashtëm që veprojnë me forca të bashkuara, por edhe nga përpjekje të brendshme për t’i dëmtuar”.

“Shkëlqesitë tuaja, zonja dhe zotërinj, detyra e katërt qëndron në themel të tri detyrave të tjera. Është detyra për të rinovuar dhe forcuar demokracinë tonë. Të gjithë e dimë që demokracitë janë nën sulm – nga armiq të jashtëm që veprojnë me forca të bashkuara, por edhe nga përpjekje të brendshme për ti dëmtuar. Duhet t’u kundërvihemi këtyre tendencave me gjithë energjinë tonë”, theksoi ajo.

Së bashku me personalitete te tjera të shquara ndërkombëtare në ceremoninë e mbajtur në katedralen e Ahenit në Gjermani ishte edhe kryeministri Edi Rama. Që nga viti 1950, Çmimi Ndërkombëtar i Karlit të Madh u ndahet individëve ose institucioneve me kontribute të shquara për Evropën dhe unitetin evropian. Këtë vit, për herë të parë, ai shoqërohet me një milion euro, të cilat do të investohen në projekte proevropiane.

/rtsh.al/