Vora-Egnatia në RTSH, Bellaj: Një ndeshje me dy tablo

Trajneri i Vorës, Arjan Bellaj ka folur për emisionin “Super Gol” në RTSH pas humbjes përballë Egnatias, në sfidën e vlefshme për javën e dytë të kampionatit Abissnet Superiore. Tekniku i Vorës vlerëson kundërshtarin, të cilin e konsideron ekipin më të mirë në Shqipëri, por në të njëjtën kohë përgëzon djemtë e tij për atë që dhanë në fushë dhe beson se skuadra do të ecë përpara.

“Kishte dy tablo. Kishim pjesën e parë, treguam karakter, deri në gjysmën e pjesës së dytë pa u kryer zëvendësimet ku edhe kaluam në avantazh. Bëmë gol, por nuk ditëm ta mbanim. Kishim përballë një ekip siç është Egnatia që besoj është ekipi më i mirë në Shqipëri. Ekip që po e tregon qartë me pjesëmarrjen në grupe. E dinim që po luanim me një nga ekipet në të mira. U treguam në pjesën e parë pak cinikë, duhej të ishim më serioz në pasat e fundit, po të shënonim do të ishte ndeshja më ndryshe. E bëmë në pjesën e dytë, pror nuk ishim ata që duhet të ishim siç ishim në pjesën e parë kur ishim më kompakt. E humbëm pas minutës së 65, ndaj erdhi pësimi i golave. gjithsesi duhet të përgëzoj çunat për atë që dhanë në fushë.

Nuk është mungesë eksperience, gjysma e lojtarëve janë të njëjtët. Është diferencë në moshë, por duhet të luftosh pak më shumë e të bësh më shpejt në fushën tënde. Nuk jemi si vitin e kaluar, besoj se jemi më mirë si nga cilësia, edhe interpretimi i lojës. Edhe humbja nganjëherë nuk duhet marrë sikur mbaroi gjithçka, me atë që treguan, unë kam besim se do të shkojmë përpara”, ka thënë mes të tjerash Bellaj.