Vrau babain me thikë – Autori i qeshur në gjykatë, avokatja kërkon vlerësim të shëndetit mendor

Gjykata e Durrësit la në burg pa afat Marjan Kodhelin, i cili akuzohet se vrau me thikë babain e tij Pjetër Kodheli, ku përpara togave të zeza i riu ishte i qeshur.

Pak para se të jepej vendimi, Marjan Kodheli tha në sallën e gjyqit se nuk është dakord që është konsideruar person i rrezikshëm.

“Mua po më sulmonin, nuk e di kush më ka sulmuar. Mund të ketë qenë dikush tjetër që e ka sulmuar. Më vjen shumë keq që jam këtu për një situatë të tillë. Mbase bëjmë një senacë tjetër kur të jem më i qetë.  Unë nuk jam njeri agresiv, jam marrë me punë të ndershme në ndërtim”.

Prokurorja e çështjes Matilda Fetahu tha se janë marrë dëshmitë e familjarëve pas ngjarjes nga ku rezulton se Marjani ka qenë i mërzitur atë ditë. Këtë fakt e ka konfirmuar edhe e ëma e tij.

Në momentin që ajo ka dalë jashtë për t’u kujdesur për bagëtitë, ka dëgjuar britmat e Pjetrit dhe më pas është kthyer në banesë, ku ka parë Marjanin duke e goditur të atin me thikë në trup. Ajo ka tentuar t’ia marrë thikën, por nuk ka mundur. 

Pasi ishte larguar nga banesa, ishte kthyer sërish për të marrë celularin. Meqë e ëma i kishte hequr thikën nga dora, ai kishte marrë një shufër hekuri dhe e ka goditur sërish të atin dy herë të tjera, përpara se të merrte celularin dhe të largohej përfundimisht nga banesa.

Avokatja që e mbron Kodhelin kërkoi vlerësimi e shëndetit mendor të klientit të saj.

Ngjarja e rëndë ndodhi të martën e kaluar në fshatin Shkallnur të Durrësit, pas një grindje në banesën e familjes Kodheli.

Gazetare: Flutura Tota

/rtsh.al/