Zbulohet “fabrika” e kanabisit në Shkodër, arrestohet organizatori dhe 6 punonjëse, sekuestrohen 12.6 kg drogë e lëndë shpërthyese

Policia e Shtetit ka finalizuar me sukses operacionin e koduar “Ndërmollasi”, duke goditur një ambient të përdorur për përpunimin dhe përgatitjen për shitje të lëndës narkotike në zonën e Shkodrës. Si rezultat i këtij operacioni, u kap dhe u vu në pranga organizatori i kësaj veprimtarie kriminale, si dhe gjashtë shtetase, përfshirë një minorene, të cilat ishin punësuar për përpunimin e drogës.

Gjatë kontrolleve të zhvilluara nga Sektori për Hetimin e Narkotikëve, Forca Operacionale dhe “Shqiponja”, u zbulua një bazë e përdorur për procesimin e lëndës narkotike. Kontrolli i kryer në banesën e organizatorit, shtetasit R. M. (35 vjeç), dhe në ambientet përreth, çoi në sekuestrimin e një arsenali të konsiderueshëm.

Në total, forcat policore sekuestruan:

12 kilogramë e 671 gramë lëndë e dyshuar narkotike kanabis, e cila ishte në fazë përpunimi, e gatshme për t’u shitur.

4.5 kg material i dyshuar lëndë shpërthyese artizanale dhe municion luftarak.

1 automjet dhe 4 motomjete të dyshuara të trafikuara, pa targa dhe numër shasie.

7 celularë dhe një shumë prej 700 eurosh.

Të arrestuarit dhe përfshirja e grave

Operacioni “Ndërmollasi”, sipas policis, rezultoi në arrestimin e shtatë personave në flagrancë, të gjithë banues në Shkodër. Gjashtë prej tyre janë gra, të cilat punonin në ambientin e zbuluar për përpunimin e kanabisit.

Lista e të arrestuarve përfshin organizatorin, R. M., si dhe shtetaset L. M. (51 vjeçe), A. Z. (22 vjeçe), L. K. (46 vjeçe), P. K. (43 vjeçe), Z. K. (18 vjeçe), dhe një shtetase 16-vjeçare (minorene).

Policia konfirmoi se “puna po vijon intensivisht për dokumentimin e plotë të kësaj veprimtarie kriminale dhe për identifikimin e personave të tjerë potencialisht të përfshirë”.

Materialet procedurale i janë referuar Prokurorisë së Shkodrës për veprime të mëtejshme ligjore.

/rtsh.al/