Zelensky këmbëngul që Trump të jetë i pranishëm në Turqi: Do t’i japë Putinit një nxitje shtesë për të ardhur

Volodymyr Zelensky  ftoi homologun e tij amerikan Donald Trump të udhëtojë për në Turqi nesër, të enjten, në mënyrë që Vladimir Putin të pranojë  propozimin e presidentit ukrainas për t’u takuar ballë për ballë për të negociuar përfundimin e luftës.

Presidenti brazilian Luiz Inacio Lula da Silva siguroi sot nga Pekini se do të ushtrojë presion mbi Putinin që të shkojë në Stamboll më 15 maj për të folur drejtpërdrejt me Zelenskyn.

Për momentin, presidenti ukrainas akuzon homologun e tij rus se “nuk dëshiron” t’i japë fund luftës, por ai u zotua të “bëjë gjithçka” që ky takim në nivelin më të lartë të zhvillohet nesër.

“Nëse (Presidenti i SHBA-së Trump) konfirmon pjesëmarrjen e tij, besoj se kjo do t’i japë Putinit një nxitje shtesë për të ardhur”, tha Zelensky dje, të martën në mbrëmje nga Kievi.

Të hënën, përpara se të niste një turne në vendet e Gjirit, Donald Trump  i ftoi të dy palët ndërluftuese të shkonin në Turqi për negociata.

Në fakt, republikani deklaroi se po “shqyrton” kalimin nëpër Stamboll, por për momentin, ajo që është e sigurt është se Sekretari Amerikan i Shtetit “do të jetë atje”.

Nga ana ruse, Kremlini as nuk konfirmoi dhe as nuk mohoi praninë e Putinit në Turqi.

“Pala ruse vazhdon të përgatitet për negociatat që pritet të zhvillohen të enjten. Për momentin nuk planifikojmë të bëjmë komente të mëtejshme”, tha zëdhënësi i Kremlinit, Dmitry Peskov, duke shtuar se “delegacioni (rus) do të jetë i pranishëm dhe do të presë palën ukrainase”.

Për Zelenskyn, nëse Putini nuk shkon në Turqi, ky do të jetë “një tregues i qartë” se ai “nuk dëshiron ta ndalojë luftën”.

Sidoqoftë, presidenti ukrainas do të udhëtojë për në Ankara sot ose nesër për t’u takuar me homologun e tij turk, Recep Tayyip Erdogan, sipas Kievit. Turqia kishte organizuar bisedimet e para midis rusëve dhe ukrainasve në mars të vitit 2022, të cilat nuk çuan në ndonjë rezultat.

Që atëherë, bisedimet midis dy palëve janë pezulluar, megjithëse Trump është përpjekur t’i ringjallë ato që nga rikthimi i tij në presidencën e SHBA-së më 20 janar, pa ndonjë përparim të dukshëm deri fundjavën e kaluar.

Pastaj Ukraina, Franca, Gjermania, Britania dhe Polonia i kërkuan Putinit të pranonte një “armëpushim të pakushtëzuar dhe të plotë” që do të zgjaste 30 ditë duke filluar nga 12 maji, duke e kërcënuar atë se përndryshe do të vendosnin “sanksione të reja masive” ndaj Moskës.

Duke injoruar këtë ultimatum, presidenti rus deklaroi gatishmërinë e tij për bisedime “të drejtpërdrejta” ruso-ukrainase më 15 maj në Stamboll.

Zelensky u përgjigj duke sugjeruar që të takohej “personalisht” me Putinin në qytetin turk.

Por zëvendësministri i Jashtëm rus, Sergei Ryabkov, përsëriti se vendi i tij dëshiron patjetër të diskutojë “shkaqet rrënjësore” të konfliktit.

Përveç anëtarësimit të Ukrainës në NATO, Putini ka kërkuar vazhdimisht demilitarizimin e Ukrainës dhe siguri se Rusia do të mbajë territoret ukrainase që aneksoi në vitin 2022, përveç Krimesë, të cilën Moska e pushtoi në vitin 2014.

Ukraina dhe aleatët e saj evropianë i hedhin poshtë këto kërkesa./vizionplus.tv