Zogaj: Remitancat janë rritur për shkak të rritjes së numrit të shqiptarëve që punojnë jashtë Shqipërisë

Sipas të dhënave të Eurostat, flukset e dërgesave të emigrantëve drejt familjeve shqiptare dhe të ardhurat e punonjësve shqiptarë që punojnë përkohësisht jashtë vendit kanë shënuar rritje të ndjeshme.

Sipas analistit Preç Zogaj, kjo lidhet me rritjen e numrit të shqiptarëve që punojnë dhe jetojnë jashtë vendit.

Në emisionin “Trialog” ai u shpreh se, sipas statistikave, numri i shqiptarëve që jetojnë jashtë vendit është thuajse i barabartë me numrin e atyre që jetojnë brenda vendit.

“Është pasqyrë e një tabloje komplekse që lidhet me numrin e madh të shqiptarëve që jetojnë jashtë Shqipërisë. Nga rreth 1 mln shqiptarë që kishim jashtë vendit në 10-vjeçarin e parë të demokracisë, sot kemi rreth 2 mln e treqind e tridhjetë mijë shqiptarë, të rritur dhe fëmijë që jetojnë jashtë. Pak a shumë është numri i barabartë i banorëve brenda me banorët jashtë. Sipas të dhënave që kam unë, numri total i shqiptarëve që kanë dalë nga Shqipëria pas ’90 është 4.7 mln banorë. Pra ka ardhur duke u rritur numri i shqiptarëve që punojnë jashtë  vendit nga vendi në vend”, tha Zogaj.

/rtsh.al/