“Zonja e zezë Nexhmije Hoxha” e shkrimtarit dhe publicistit Fahri Balliu botohet në çekisht

Libri vjen për lexuesin çek, në Ditën Ndërkombëtare të Përkujtimit të Viktimave të Komunizmit. Botimi në çekisht është përkthimi në gjuhën e shtatë të huaj, pas botimeve në anglisht, frëngjisht, rumanisht, maqedonisht, turqisht dhe gjuhën boshnjake

Në Ditën Ndërkombëtare të Përkujtimit të viktimave të komunizmit në Ceki, shtëpia botuese çeke “Nase Vojsko”, hedh në treg për lexuesin monografinë “Zonja e zezë Nexhmije Hoxha”, të shkrimtarit dhe publicistit Fahri Balliu, si homazhin më të mirë për të njohur një të kaluar të errët, siç ishte komunizmi shqiptar. Botimi i këtij libri në gjuhën çeke është një moment i rëndësishëm për librin shqip, i cili është i rrallë në këtë gjuhë. Libri është përkthyer Hana Matousu dhe Ilir Allushi dhe vjen për lexuesin nën një kurim tepër të kujdesshëm dhe luksoz nga shtëpia botuese “Nase Vojsko”. Ashtu si në të gjitha botimet, edhe botimi çek, shoqërohet nga parathënia e shkrimtarit Ismail Kadare. “Gratë e diktatorëve kanë pasur fate të ndryshme, disa prej tyre kanë qenë viktima, si gruaja e Stalinit, e cila iu kundërvu gjithmonë egërsisë së regjimit që kishte vendosur i shoqi, të tjera kanë qenë po kaq keqbërëse sa burrat e tyre, e një rast spikatës mishërohet tek zonja Mao, por edhe pse më pak e njohur se këto, Nexhmije Hoxha ishte më e poshtra ndër të gjitha, mund të themi se qe më e keqja”. Pas suksesit të jashtëzakonshëm që ka njohur në tregun shqiptar me disa edicione të veçanta botimesh, që kur libri u botua për herë të parë, libri i publicistit Fahri Balliu “Zonja e Zezë Nexhmije Hoxha”, është botuar në disa gjuhë. Prezantimi i parë me lexuesin perëndimor i librit “Zonja e Zezë Nexhmije Hoxha”, ka qenë publikimi i editorit franko-zviceran “Favre”, më pas ka ardhur përkthimi në anglisht, botimi në rumanisht, nga botuesi më i madh në vend, “Humanitas”, në maqedonisht nga shtëpia botuese “Serembe” dhe në turqisht nga enti më i madh botues në vend  “Hayat”. Për vetë mënyrën sesi shkrimtari Balliu analizon një nga personazhet kyç të diktaturës komuniste në Shqipëri, siç ishte e veja e diktatorit Nexhmije Hoxha, libri vijon të jetë interesant për lexuesin. Për shumë kritikë përfshi dhe kritikat e fundit nga shtypi çek, libri është një nga rrëfimet më të mira të bëra ndonjëherë për komunizmin. Libri konsiderohet si një akuzë e gjallë ndaj krimeve të komunizmit, si mënyra më e mirë për të kuptuar një filozofi të frikshme me të cilën jetuan disa vende të Ballkanit. Libri është një vepër esenciale për të kuptuar Shqipërinë aktuale, për të kuptuar këtë realitet, të shpërfaqur përmes ndriçimit që u bëhet shkaqeve që prodhuan traumën, që provuan shqiptarët gjatë diktaturës së Enver e Nexhmije Hoxhës.