GDN-ja mbështet integrimin e veriut të Kosovës

Pas takimit të mbajtur të hënën në Vjenë, përmes një komunikate, GDN-ja e ka cilësuar si sfidë kyçe integrimin e të gjitha komuniteteve, sidomos atij serb. “GDN-ja mbështet plotësisht domosdoshmërinë e përforcimit të përpjekjeve për veriun e Kosovës, duke marrë parasysh rekomandimet e ICO-së, të cilat do të zhvillohen më tutje në konsultim me palët përkatëse të interesit”, thuhet në komunikatë.Aty u është bërë thirrje të gjitha palëve, përfshirë edhe Serbinë, që të luajnë rol konstruktiv në këtë proces jetik, për të siguruar kushte më të mira për jetesë në veri të Kosovës.Bazuar në pakon e Ahtisaarit, GDN-ja ka shqyrtuar dhe i ka dhënë përkrahje mandatit të Piter Feithit në Kosovë, i cili do të vazhdojë të mbajë postin e të dërguarit të BE-së dhe atë të shefit të ICO-së. Sidoqoftë, GDN-ja ka kërkuar që Feith, tani e tutje të fokusohet më tepër në përkrahjen e krijimit të kornizës institucionale të Kosovës drejt mbikëqyrjes së zbatimit.Ndryshe, GDN-ja të hënën ka vlerësuar se integriteti territorial i Kosovës është i lidhur ngushtë me stabilitetin rajonal dhe është kërkuar bashkëpunim edhe ndërmjet Serbisë dhe Kosovës në fushat rajonale që kanë të bëjnë me interesin më të mirë të Ballkanit Perëndimor dhe perspektivës evropiane.Ndërsa, institucioneve të Kosovës u është kërkuar që përveç përmirësimit të gjendjes së komuniteteve pakicë, sidomos atij serb, të bëjnë përparime urgjente në luftimin e korrupsionit, krimit të organizuar, pastaj në përmirësimin e kapacitetit administrativ dhe instalimin e sundimit të ligjit, përfshirë edhe veriun e Kosovës.