“2026, vit kyç për negociatat me BE”, Rama: Ky moment nuk mund të humbasë

2026, vit kyç për negociatat me Bashkimin Europian. Kështu është shprehur kryeministri Edi Rama gjatë fjalës së tij në podcastin “Flasim”.

Ky moment nuk mund të humbet shtoi kryeministri, teksa renditi një sërë nismash ligjore që janë ndërmarë, në disa fusha thelbësore, që do të ndikojnë pozitivisht në integrimin e vendit.

“Ky është një vit kyç për negociatat e anëtarësimit në Bashkimin Europian. Është një moment vendimtar për procesin dhe për përparimin e Shqipërisë në rrugën e negociatave.

Dhe këtë javë, pikërisht për këtë arsye, është prezantuar edhe paketa e re, me një duzinë nismash ligjore që shkojnë në drejtim të forcimit të shtetit të së drejtës, rritjes së transparencës dhe përafrimit të mëtejshëm të legjislacionit me standardet e Bashkimit Evropian dhe këto janë nisma që përfshijnë fusha thelbësore si; lufta kundër korrupsionit, mbrojtja e të drejtave të njeriut, forcimi i institucioneve, dhe nuk janë thjesht detyrime në letër, që natyrisht janë edhe detyrime në kartën e ligjit që burojnë nga negociatat, por janë dhe një investim i mëtejshëm në besimin e qytetarëve dhe në funksionimin e shtetit ligjor.

Ky është një vit kur Shqipëria duhet me patjetër të provojë se është e gatshme, jo vetëm t’i kalojë reformat, por dhe t’i jetësojë ato, duke pasur parasysh që të gjithë çdo ditë, në çdo hap, se ky moment nuk mund të humbet”, tha Rama./vizionplus.tv