Aksident i rëndë rrugor në Gjermani, MEPJ: Humbin jetën tre shtetas shqiptarë

TIRANË, 25 maj/ATSH/ Ministria për Evropën dhe Punët e Jashtme bën të ditur se është informuar nga autoritetet gjermane për një aksident të rëndë rrugor të ndodhur në orët e para të mëngjesit të datës 25 maj, pranë qytetit Koblenz (Gjermani) ku janë përfshirë disa shtetas shqiptarë.

MEPJ informoi se si pasojë e këtij aksidenti kanë humbur jetën tre shtetas shqiptarë, ndërsa katër të tjerë janë plagosur dhe po marrin trajtim në spitalet lokale.

“Ambasada e Republikës së Shqipërisë në Berlin dhe Konsullata e Përgjithshme në Mynih kanë qenë në kontakt të vazhdueshëm me autoritetet gjermane dhe kanë ndjekur nga afër zhvillimet. Hetimet për rrethanat e aksidentit janë ende në vijim”, bën të ditur MEPJ.

Ministria për Evropën dhe Punët e Jashtme shpreh ngushëllimet më të sinqerta për familjet e viktimave dhe uron shërim të plotë për të plagosurit.

“Strukturat tona konsullore kanë ofruar mbështetjen e nevojshme për qytetarët e prekur dhe kanë qenë të angazhuara gjatë gjithë ditës për të ndihmuar në menaxhimin e situatës”, thuhet në deklaratën e MEPJ-së.

Për çdo informacion shtesë, MEPJ vë në dispozicion numrin: +49 1523 79 13 997

/r.e/