Aksioni i SPAK në Vlorë/7 urdhërarreste të lëshuara

Kontrolle të SPAK në zonën ‘7 Pallatet Oslo’ në Orikum, arrestime të shumta, përfshirë Inez Hajrullën.

Vlorë– Në kuadër të një operacioni të gjerë, me urdhër të SPAK, forcat RENEA, FNSH dhe BKH kanë zbarkuar që nga orët e para të mëngjesit në qytetin e Vlorës, në zonën bregdetare të Orikumit, për të ekzekutuar 7 urdhërarreste të lëshuara pas hetimeve për disa ngjarje kriminale, ndërsa njëri nga të arrestuarit është Inez Hajrulla. Burime për Report Tv bëjnë me dije se pas arrestimit të Flodian Plakut, i njohur ndryshe si Poli Qorre, Prokuroria e Posaçme ka mundur të zbardhë një sërë ngjarjesh kriminale, duke përfshirë vrasjen e Gentjan Beqirit. Plaku u arrestua në gusht të vitit 2025 dhe gjatë operacionit të tij u sekuestruan disa telefona celularë që çuan në zbërthimin e bisedave dhe hetime të mëtejshme për krime të tjera.

Pas monitorimit të disa eksponentëve të dyshuar kriminalë, forcat e rendit kanë ndërhyrë sot në zonën e ‘Ujit të Ftohtë’, duke rrethuar një perimetër të gjerë sigurie. Aksioni ka përfshirë kontrollin e zonës së quajtur ‘7 Pallatet Oslo’, e njohur gjithashtu si baza e Inez Hajrullës. Ky operacion u realizua nga forcat RENEA dhe SPAK, ndërsa policia e Vlorës mori mbështetje nga Byroja Kombëtare e Hetimit.

Në këtë fazë, RENEA ka bllokuar Unazën e Vlorës dhe rrugën paralele me Lungomaren. Forcat e sigurisë, duke përdorur dronë për monitorim, kanë ende rreth 40 efektivë në terren. Përveç kësaj, 10 autoblinda kanë rrethuar një nga pallatet në zonën e Orikumit.

Flodian Plaku akuzohet për vrasjen e ish-policit Gentian Bejtja në mars të vitit 2024, në Larushk të Fushë-Krujës. Krimi dyshohet se ka pasur motive hakmarrjeje për shkak të luftës dhe rivalitetit mes grupeve kriminale të Fushë-Krujës, duke përfshirë emra të njohur si Ervis Martinaj, Indrit Dokle dhe Durim Bami.