Alarm global nga mbingrohja e deteve/Shkencëtarët ngrenë alarmin, zjarre në Spanjë dhe viktima në Gjermani

Detet e planetit po regjistrojnë temperaturat më të larta të matura ndonjëherë në histori, duke kërcënuar seriozisht njerëzimin me fenomene ekstreme atmosferike. Sipas të dhënave të fundit nga Shërbimi Europian Copernicus, uji i deteve ka arritur një nivel rekord prej afro njëzet e një gradë Celsius. Ekspertët paralajmërojnë se kjo mbingrohje alarmante po sjell stuhi të rrëmbyeshme, përmbytje të mëdha, por edhe thatësirë të shtuar në të gjithë Europën.

“Ne po hyjmë zyrtarisht në një territor plotësisht të panjohur për klimën,” u shpreh i shqetësuar drejtori i këtij institucioni, Carlo Buontempo. Situata paraqitet mjaft kritike edhe në Detin Mesdhe e në Adriatik, ku temperaturat e ujit po i afrohen vlerës rekord prej tridhjetë gradësh. Kjo nxehtësi e jashtëzakonshme po shkatërron biodiversitetin detar dhe po favorizon përhapjen e shpejtë të specieve të huaja pushtuese si peshku luan.

Ndërkohë, vala e të nxehtit afrikan ka gjunjëzuar Gjermaninë, ku temperaturat mbi dyzet e një gradë shkaktuan mbi pesë mijë vdekje vetëm brenda një jave. Në anën tjetër të kontinentit, Spanja po digjet nga flakët, ku një zjarr pyjor në Andaluzi ka shkaktuar të paktën dymbëdhjetë viktima.

Shumë prej trupave të pajetë u gjetën të shkrumbuar brenda makinave të tyre, teksa po tentonin të largoheshin nga rreziku. Shkencëtarët bëjnë thirrje për kujdes të shtuar, pasi forcimi i fenomenit El Niño pritet të sjellë ditë akoma më të nxehta në vazhdim

/rtsh.al/