Analiza në “Trialog”, Zogaj: PD qeverisi nga vila e Hoxhës, dhuna sot është e pajustifikueshme
Përdorimi i dhunës dhe i simbolikave të zjarrit në protestat e fundit të Partisë Demokratike ka ngjallur debate të forta mbi strategjinë e vërtetë të opozitës. Në emisionin “Trialog” në RTSH, analisti i njohur Preç Zogaj ofroi një skanim kritik të këtyre zhvillimeve, duke i cilësuar aktet e fundit jo si shpërthime spontane të militantëve, por si skenarë të mirëmenduar nga lidershipi për të prodhuar lajm.
Fokusi i kritikës ishte goditja e ish-vilës së diktatorit Enver Hoxha, një akt që, sipas Zogajt, zbulon një mungesë të thellë vizioni dhe një kontradiktë me vetë historinë qeverisëse të PD-së.
Një nga argumentet qendrore të Zogajt është se dhuna nuk vjen nga baza, por është një mjet i kërkuar nga kupola drejtuese. Sipas tij, ashtu si në kohën kur u dogj bunkeri tek Ministria e Brendshme, e njëjta logjikë po aplikohet edhe sot me vilën në ish-Bllok.
”Një parti politike parlamentare e ka rrugën e vetme drejt pushtetit përmes kutive të votimit. Përdorimi i dhunës ndaj institucioneve apo palës tjetër del jashtë çdo kornize demokratike dhe parimore.“, tha Zogaj.
Sipas tij, krijimi i vatrave të zjarrit dhe shkatërrimi i objekteve përdoren si një mjet për të mbajtur ndezur vëmendjen e publikut, në mungesë të një alternative politike frymëzuese.
Paradoksi i Vilës dhe kujtesa historike
Zogaj theksoi kontrastin e fortë mes lëvizjes antikomuniste të viteve ’90 dhe veprimeve të sotme. Ndërsa rrëzimi i busteve të Enver Hoxhës në ’90-’91 ishte një goditje e domosdoshme ndaj simboleve të gjalla të diktaturës, sulmi ndaj një godine shtetërore përbën thjesht akt dhune ndaj pronës publike.
“Godina në ish-Bllok nuk është më “vila e Hoxhës”, por një aset shtetëror, i cili aktualisht shërben edhe si qendër kulture.”, tha ai.
Për më tepër, analisti kujtoi një fakt thelbësor historik. Gjatë viteve që Partia Demokratike ka qenë në pushtet, ajo vetë e ka përdorur atë vilë për pritje zyrtare qeveritare, duke e njohur dhe trajtuar si një aset të vlefshëm të shtetit shqiptar.
Sipas Zogajt, vetë drejtuesit e lartë të PD-së janë të vetëdijshëm për këtë fakt nga koha e tyre në qeverisje, gjë që e bën sulmin e fundit ndaj atij objekti të duket tërësisht absurd dhe jashtë logjike.
Analiza u ndal te kostoja që ky “frymëzim për të shkatërruar” i ka sjellë Shqipërisë ndër vite. Sipas tij, një vend që është ndërtuar me mund dhe gjak, shpesh është shkatërruar nga pasionet e verbra politike të tranzicionit.
Zogaj theksoi se diferenca thelbësore mes një diktature dhe një demokracie janë vlerat: demokracia ndërton, ndërsa antikomunizmi më i mirë nuk është shkatërrimi i godinave, por vetë forcimi i sistemit demokratik.
Sipas tij, fakti që pas kaq shumë vitesh në opozitë PD vazhdon të përdorë të njëjtën retorikë dhe të njëjtat forma proteste pa arritur asnjë rezultat konkret për rrotacion politik, dëshmon shterpësinë e kësaj strategjie.
/rtsh.al/