Ankohen zjarrfikësit në Fier, drejtuesit vendorë dakordësohen me kërkesat

Mungesë mjetesh zjarrfikëse, rritje pagash, vendosje hidrantesh, kanë qenë disa nga kërkesat e shefave të reparteve zjarrfikëse të bashkive të qarkut Fier në takimin e organizuar  në prefekturën e këtij qarku.

Në fokus ishte situata e zjarreve ku morën pjesë të gjithë drejtuesit e reparteve zjarfikëse të gjashtë bashkive të qarkut, përfaqësues të Drejtorisë Vendore  të Policisë, si dhe këshilltari i Ministrit të Brenshsëm.

Prefekti i qarkut Fier, Arben Çuko ka pohuar se krahas punës së mirë të bërë në fikjen e zjarreve nga efektivët, problematikë madhore mbetet mungesa e mjeteve, veçanërisht në bashkinë e Mallakastrës, e cila ka terren të thyer dhe shtrirje të gjerë gjeografike, por dhe mungesa e  hidrantëve  në  qytete apo zonat e banuara.

Ndërkohë këshilltari i Ministrit të Brendshëm, theksoi rëndësinë e bashkëpunimit të ngushtë ndërmjet institucioneve, forcave të rendit dhe emergjencave, për të garantuar një reagim të shpejtë dhe efikas ndaj situatave të rrezikshme.

“Jemi duke punuar për një strategji të re kombëtare”, ka thënë Mamaj, përfshirë edhe ndryshime ligjore.

Një pjesë e zjarreve kanë qënë të qëllimshme ndaj po punohet fort në drejtim të identifikimit dhe ndëshkimit të piromanëve.

Mamaj ka vlerësuar gjithashtu edhe ndërhyrjen e banorëve në vatrat e rrezikshme , të cilët i janë bashkuar aksioneve për shuarjen e flakëve ndërkohë që ka shuar zërat për zjarrvënie me qëllim ndërtimin e paneleve fotovoltaike veçanërisht në jug të vendit./vizionplus.tv