Art dhe pasion mbi argjendin, Lindita Musa, e vetmja argjendare grua në Shkodër

Në Shkodër mes zanateve që po i rezistojnë kohës është edhe ai i argjendarisë. Prej dekadash Lindita Musa është e lidhur fort me artin e metaleve të çmuara që mbetet pjesë e përditshmërisë së saj edhe sot.

“14-vjec jam futur në zanatin e artistikes, në repartin e argjendarisë dhe u dashurova me këtë punë”, u shpreh Musa.

Me kalimin e viteve puna në argjend ka ndryshuar por mjetet e saj  artizanale janë ende pjesë e punës së saj duke i dhënë çdo krijimi finesë të veçantë.

Në Shkodër Lindita Musa është e vetmja grua artizane e argjendit  një zanat i dominuar kryesisht nga burrat.

“Vështirësi kam pasur sepse shkrirja dhe rrahja e telave kërkonte forcë”, tha ajo.

Për Linditën puna artizanale mbetet zemra e këtij zanati që shpreson të mos humbasë me brezat e rinj. Lindita Musa vazhdon ta ushqejë me pasion artin e argjendarisë, sepse për të çdo punim është një histori e gdhendur në metal të çmuar.

Gazetare: Blerta Cina

/rtsh.al/