BE kritikon SHBA për zgjatjen e përjashtimit nga sanksionet ndaj naftës ruse
Brukseli ka shprehur pakënaqësi ndaj vendimit të Uashingtonit për të zgjatur edhe me 30 ditë përjashtimin nga sanksionet mbi naftën ruse që tashmë ndodhet në det, duke paralajmëruar se ky hap rrezikon të rrisë ndjeshëm të ardhurat e Moskës në një kohë kur lufta me Iranin ka tronditur tregjet energjetike globale.
“Nga pikëpamja e BE-së, nuk mendojmë se kjo është koha për të lehtësuar presionin mbi Rusinë,” deklaroi komisioneri i ekonomisë Valdis Dombrovskis përpara takimit të ministrave të financave të G7 në Paris. Ai shtoi se “Rusia është ajo që po përfiton nga lufta në Iran dhe rritja e çmimeve të karburanteve fosile. Nëse ka ndonjë gjë, presioni duhet forcuar.”
Vendimi i SHBA-së u njoftua nga sekretari i thesarit Scott Bessent, i cili argumentoi se masa synon të stabilizojë tregun fizik të naftës bruto dhe të sigurojë furnizim për vendet më të cenueshme energjetikisht. Sipas tij, kjo gjithashtu do të kufizojë aftësinë e Kinës për të grumbulluar naftë me çmime të ulëta.
Ky është zgjatimi i dytë 30-ditor i përjashtimit, i prezantuar fillimisht në mars, ndërsa administrata e Donald Trump përpiqet të përmbajë rritjen e çmimeve të naftës pas sulmit amerikano-izraelit ndaj Iranit në fund të shkurtit.
Konflikti, i cili aktualisht është nën një armëpushim të brishtë, ka përfshirë sulme të përsëritura ndaj infrastrukturës energjetike në Lindjen e Mesme dhe ka çuar në një bllokadë të dyfishtë në Ngushticën e Hormuzit – një arterie kritike për furnizimet globale me naftë dhe gaz.
Rritja e çmimeve të energjisë ka sjellë përfitime të mëdha për ekonominë ruse, e cila varet nga eksportet e lëndëve djegëse fosile. Sipas Qendrës për Kërkime mbi Energjinë dhe Ajrin e Pastër në Finlandë, të ardhurat e Rusisë nga eksportet e fosileve arritën në 733 milionë euro në ditë gjatë prillit – niveli më i lartë në dy vjet e gjysmë.
Tregjet mbetën të tensionuara edhe të martën, pasi presidenti Trump njoftoi se kishte anuluar një sulm ndaj Iranit pas kërkesave të udhëheqësve të Gjirit.
Nafta Brent po tregtohej rreth 110 dollarë për fuçi, rreth 40 dollarë më shumë se para fillimit të konfliktit.
/rtsh.al/