BRAZIL – Parlamenti njofton ratifikimin e marrëveshjes BE-Mercosur

BRAZILIA, 2 shkurt /ATSH-ANSA/- Kryetari i Dhomës së Deputetëve të Brazilit, Hugo Motta njoftoi sot se ratifikimi i marrëveshjes tregtare Mercosur-Bashkimi Evropian – e nënshkruar muajin e kaluar pas 26 vitesh negociatash – do të ishte një përparësi në axhendën parlamentare.

“Ne po presim dorëzimin e dokumentit nga qeveria, dhe premtojmë t’i japim përparësi votimit për traktatin”, u tha Motta gazetarëve pas mbërritjes së tij në Parlament në ditën e hapjes së vitit legjislativ.

Më herët, kryetari i Dhomës njoftoi qëllimin e votimit për traktatin para Karnavaleve.

Presidenti Luiz Inácio Lula da Silva pritet ta dorëzojë dokumentin në Parlament këtë javë.

Marrëveshja tregtare e Brazilit – e njoftuar tashmë nga vendet e tjera të bllokut Argjentina, Paraguai dhe Uruguai – u konfirmua nga zëvendëspresidenti Geraldo Alckmin.

Ai deklaroi se qeveria po planifikonte të përshpejtonte procesin e ratifikimit për të dërguar një sinjal politik në BE, pasi Parlamenti Evropian e paraqiti traktatin në Gjykatën e Drejtësisë për shqyrtim, një hap që mund të vonojë hyrjen e tij në fuqi. //a.i/