BRUKSEL – Belgjika dhe Gjermania nisin hetimet pasi 15 dronë fluturuan mbi bazën ushtarake
BRUKSEL, 3 tetor /ATSH/- Ministria e Mbrojtjes e Belgjikës po heton pasi 15 dronë u panë të enjten në mbrëmje mbi bazën ushtarake Elsenborn pranë kufirit gjerman, sipas raportimeve të mediave lokale, sipas “Politico”.
Ministria e Mbrojtjes tha po kryheshin hetime për incidentin. Ministri belg i Mbrojtjes, Theo Francken tha sot se aktualisht nuk kishte prova konkrete që lidhin incidentin me Rusinë.
“Kjo duhet të hetohet. Personalisht, mendoj se këto dronë janë shpesh një shembull i kërcënimeve hibride. Kjo është një mënyrë për të mbjellë trazira. Ky ka qenë modeli i Rusisë për shumë vite”, tha ai.
Dje në mbrëmje, një incident mbi Aeroportin e Mynihut detyroi kontrollin e trafikut ajror të pezullonte operacionet, duke çuar në anulimin e 17 fluturimeve dhe duke prekur gati 3 000 pasagjerë.
“Aeroporti i Mynihut, në bashkëpunim me linjat ajrore, u kujdes menjëherë për kujdesin e pasagjerëve në terminale. U vendosën shtretër kampingu, u shpërndanë batanije, pije dhe ushqime të lehta”, tha sot Aeroporti i Mynihut në një deklaratë.
Zyrtarët e aeroportit shtuan se 15 fluturime hyrëse ishin devijuar në Stuttgart, Nuremberg, Vjenë dhe Frankfurt.
Në javët e fundit, aeroportet në Danimarkë dhe Norvegji kanë pezulluar gjithashtu operacionet – pasi disa dronë ishin raportuar në hapësirën e tyre ajrore, duke nxitur debatin midis udhëheqësve evropianë mbi fizibilitetin e një “muri dronësh” në krahun lindor për t’u mbrojtur nga armiqësia ruse.//a.i/