Bien sërish sirenat e alarmit në bazën ushtarake britanike në Qipro, banorët urdhërohen të qëndrojnë brenda

Sirenat e sulmit ajror u ndezën sërish në bazën ushtarake mbretërore RAF Akrotiri në Qipro ditën e sotme në orën 10:20 me orën lokale, pasi një kërcënim i vazhdueshëm i sigurisë detyroi autoritetet të urdhërojnë banorët të qëndrojnë brenda dhe të marrin masa mbrojtjeje.

Banorët u këshilluan të largohen nga dritaret dhe të strehohen pas ose nën mobilje të forta deri në njoftimin e mëtejshëm zyrtar.

Ky është alarmi i tretë i dhënë brenda një jave në Akrotiri, teksa më parë janë kapur nga forcat ushtarake edhe dronë pa pilotë. Britania, Gjermania dhe Greqia kanë dërguar mbështetje ushtarake për bazën, e cila shihet si një shënjestër e mundshme e Iranit që prej nisjes së sulmeve amerikano-izraelite drejt Teheranit.

Ndërkohë Qipro po përgatitet të aktivizojë në qershor Sistemin Publik të Paralajmërimit (PËS), një hap që pritet të forcojë aftësinë e vendit për të paralajmëruar qytetarët gjatë emergjencave si zjarret, tërmetet, sulmet terroriste ose konflikte të tjera.

Sistemi do t’i lejojë Mbrojtjes Civile të dërgojë mesazhe paralajmëruese brenda sekondash në të gjitha telefonat mobilë në një zonë të caktuar përmes operatorëve celularë. Paralajmërimi do të shfaqet automatikisht në ekran, me një zë alarmi dhe udhëzime për mbrojtjen personale.

Mesazhi do të arrijë të gjitha telefonat në zonën e caktuar, edhe nëse nuk janë të lidhur me internetin dhe pa nevojën për instalimin e ndonjë aplikacioni të veçantë.

Megjithëse nevoja për një sistem të tillë është e qartë, zbatimi i tij është vonuar për disa vite.

Autoritetet theksojnë se platforma synon të përmirësojë gatishmërinë e vendit për emergjenca duke mundësuar komunikim më të shpejtë me publikun gjatë situatave kritike.