Buxheti 2026 për kultet, ndarja e detajuar e 203 milionë lekëve për bashkësitë fetare, ja sa përfiton secili komunitet

Këshilli i Ministrave ka miratuar dhe zbardhur vendimin për përcaktimin e masës së financimit nga buxheti i shtetit për vitin 2026, në mbështetje të komuniteteve kryesore fetare në vend. Sipas vendimit, fondi total prej 203 milionë lekësh të rinj do të shpërndahet njëherësh brenda muajit prill 2026.

Ky fond shtetëror akordohet kryesisht për të mbuluar deri në gjysmën e pagës minimale buxhetore për punonjësit e administratës dhe personelin e institucioneve të arsimit parashkollor, parauniversitar dhe universitar që menaxhohen nga këto bashkësi. Gjithashtu, një pjesë e buxhetit është destinuar për investime specifike dhe statuse të veçanta.

Ndarja e fondeve sipas komuniteteve

Komuniteti Mysliman i Shqipërisë (KMSH)

KMSH përfiton vlerën më të madhe të këtij fondi, prej 57.3 milionë lekësh. Nga kjo shumë, 28.2 milionë lekë do të shkojnë për mbështetjen e 94 punonjësve të administratës, ndërsa 29.1 milionë lekë do të financojnë pagat e 97 punonjësve në institucionet arsimore të këtij komuniteti.

Kisha Ortodokse dhe ajo Katolike

Kisha Ortodokse Autoqefale e Shqipërisë dhe Kisha Katolike në Shqipëri do të mbështeten me një fond të barabartë prej 48.6 milionë lekësh secila, por me një shpërndarje të ndryshme të brendshme:

Kisha Ortodokse do të përdorë 24.6 milionë lekë për 82 punonjës administrate dhe 24 milionë lekë për 80 punonjës të arsimit.

Kisha Katolike do të destinojë 15 milionë lekë për 50 punonjës administrate, ndërsa pjesa më e madhe prej 33.6 milionë lekësh do të shkojë për mbështetjen e 112 punonjësve në institucionet e saj arsimore.

Kryegjyshata Botërore Bektashiane

Për Kryegjyshatën Botërore Bektashiane është përcaktuar një fond prej 48.5 milionë lekësh, i cili ka një strukturë tjetër shpenzimesh. Vetëm 9 milionë lekë do të shkojnë për 30 punonjës administrate. Pjesa tjetër është e ndarë në zëra specifikë: 28 milionë lekë do të shërbejnë si kontribut i shtetit për ndërtimin e Teqesë së Shtufit në Gjirokastër, ndërsa 11.5 milionë lekë jepen si fond i posaçëm për shkak të statusit të veçantë si qendër botërore në Tiranë dhe veprimtarisë së saj jashtë vendit.

Zbatimi i vendimit

Qeveria ka ngarkuar Ministrinë e Financave dhe Komitetin Shtetëror për Kultet për zbatimin dhe monitorimin e këtij vendimi, i cili ka hyrë menjëherë në fuqi pas botimit në Fletoren Zyrtare. Ndihma financiare shtetërore buron nga marrëveshjet dypalëshe që shteti shqiptar ka nënshkruar me komunitetet fetare për njohjen dhe mbështetjen e kontributit të tyre në shoqëri.

/rtsh.al/