Ceremoni spektakolare e mbylljes së Lojërave Olimpike 2026, nga opera te muzika pop. Parakalon edhe flamuri shqiptar në Arenën e Veronës. Për 2030, stafeta i kalon Francës
Lojërat Olimpike Dimërore Milano-Cortina 2026 u mbyllën zyrtarisht me një ceremoni madhështore në Arena di Verona, e cila për këtë rast u shndërrua në “Arenën Olimpike të Veronës”. Ceremonia u transmetua drejtpërdrejt në Radio Televizioni Shqiptar përmes RTSH 1 dhe RTSH Sport.
Mbrëmja festive nisi me interpretimin e fuqishëm të “Brindisi” nga opera La Traviata, duke i dhënë ceremonisë një hapje elegante dhe tipikisht italiane. Spektakli përfshiu një homazh për operën italiane, me një skenografi mbresëlënëse ku një llambadar kolosal i ndriçuar dominonte arenën, ndërsa personazhi i Rigoletto u shfaq në mënyrë simbolike mbi të. Kameliat, valltarët, gratë me llambadarë dhe orkestra krijuan një tablo artistike të gëzueshme dhe vizualisht mahnitëse.
Në arenë mbërriti flaka olimpike dhe ceremonia vijoi me paradën e flamujve të 93 kombeve pjesëmarrëse. Sipas traditës, parakalimin e hapi Greqia, vendlindja e Lojërave Olimpike, e ndjekur nga flamuri shqiptar. Shqipëria u përfaqësua në këto lojëra nga Denni Xhepa, Lara Colturi, Semire Dauti dhe Lisa Brunga.
Më pas, 1,400 sportistë nga 2,900 pjesëmarrës u rikthyen në arenë për festën përmbyllëse, ndërsa u shpërndanë edhe medaljet e fundit të arta.
Ceremonia, e titulluar “Bukuria në Veprim”, vuri në qendër kulturën italiane, muzikën dhe artin. Ndër artistët e njohur që performuan ishin Roberto Bolle, Achille Lauro, Gabry Ponte, Benedetta Porcaroli, si dhe Orkestra e Fondazione Arena di Verona.
Gjatë ceremonisë u bë dorëzimi simbolik i stafetës për Lojërat Olimpike Dimërore 2030, të cilat do të mbahen në Alpet Franceze, në rajonet Provence-Alpes-Côte d’Azur dhe Auvergne-Rhône-Alpes, nga 1 deri më 17 shkurt 2030.
E pranishme në ceremoni ishte edhe kryeministrja italiane Giorgia Meloni, e cila vlerësoi organizimin dhe emocionet që këto Lojëra sollën për Italinë, duke falënderuar sportistët, organizatorët dhe vullnetarët për kontributin e tyre.
Me një program të pasur artistik dhe një skenografi spektakolare, ceremonia e mbylljes solli një përmbledhje magjepsëse të kulturës dhe bukurisë italiane, duke ulur siparin e një Olimpiade të paharrueshme.
/rtsh.al/