Çmimi i naftës vijon rritjen/ Arrin 104 dollarë për fuçi, është rritur me 40 përqind në dy javë

Çmimet e naftës u rritën sërish të hënën ndërsa administrata e Donald Trump po rrit presionin mbi aleatët për të ndihmuar në mbrojtjen e Ngushticës së Hormuzit. Kontratat e naftës së papërpunuar brent arritën në 104 dollarë për fuçi, duke u shtrenjtuar me 1.5% krahasuar me sesionin e mëparshëm.

Si nafta brent ashtu edhe ajo amerikane janë rritur me më shumë se 40%, duke arritur në nivelet e tyre më të larta që prej vitit 2022. Ka pak gjasa se lufta që ka hyrë tashmë në javën e tretë të përfundojë së shpejti.

Sulmet që kanë shënjestruar infrastrukturën energjetike dhe bllokimi i ngushticës së Hormuzit që lidh Gjirin me tregun botëror ka shkaktuar ndërprerjen më të madhe të furnizimit me naftë në histori.

Edhe pse Shtetet e Bashkuara duket se e kanë kursyer infrastrukturën e naftës së Iranit për momentin, presidenti amerikan Dondald Trumpt paralajmëroi se do ta rishqyrtonte këtë vendim nëse Irani do të vazhdonte me ndërhyrjet në kalimin e anijeve përmes ngushticës së Hormuzit.

Çmimet e naftës po vazhdojnë të rriten pavarësisht vendimit të më shumë se 30 vendeve për të liruar 400 milionë fuci naftë nga rezervat strategjike. Mbyllja e ngushticës së Hormuzit po ndikon më shumë sesa vetëm naftën.

Fermerët në të gjithë botën mbështeten në plehrat që transportohen përmes kësaj rruge ujore, duke ndikuar kështu në cmimet e ushqimeve. Edhe produkte të tjera si ato të qumështit, peshkut, fruta perimet mund të jenë ndër grup mallrat që do të bëhen edhe më të kushtueshme.