Engjëll Agaçi mbi 3 orë në SPAK: U thërrita për inceneratorin e Tiranës

Sekretari i Përgjithshëm i Kryeministrisë Engjëll Agaçi është paraqitur këtë të premte (17 maj) në Prokurorinë e Posaçme Kundër Korrupsionit.

Agaçi ka dhënë sqarime para prokurorëve të SPAK për rreth 3 orë e 30 minuta, ndërsa sqaroi për gazetarët se u thirr për inceneratorin e Tiranës.

“U thirrja për inceneratorin e Tiranës. Mendoj se ky nuk duhet të krijojë një lajm. Të gjithë duhet të jemi në dispozicion të organeve të drejtësisë”, tha Agaçi.

Për inceneratorin e Tiranës kanë dëshmuar më herët edhe zv.kryeministrja Belinda Balluku dhe kryetari i Bashkisë Tiranë, Erion Veliaj.   

Prokuroria e Posaçme Anti-Korrupsion po heton 7 abuzime me Inceneratorin e Tiranës, ku rezulton se janë kryer një sërë veprimesh në kundërshtim me ligjin gjatë dhënies së koncesionit  dhe po ashtu edhe gjatë zbatimit të tij.  

/rtsh.al/