FOKUS – Çmimet e naftës në rritje mes tensioneve në Hormuz, pavarësisht nismës së Trump
NJU JORK/ LONDER, 4 maj /ATSH-DPA/- Nisma e presidentit amerikan Donald Trump për të ndihmuar anijet e bllokuara në Ngushticën e Hormuzit nuk arriti të qetësojë sot tregjet globale të naftës, ndërsa çmimet u rritën në 109,84 dollarë për fuçi.
Çmimi i një fuçie (159 litra) nafte të llojit “Brent” të Detit të Veriut në korrik u rrit me 1,54%.
Trump paralajmëroi dje në platformën e tij “Truth Social” se do të reagonte ashpër ndaj çdo pengese ndaj nismës që ai e quajti “Project Freedom”.
Ndërkohë, udhëheqja ushtarake e Iranit kërcënoi sot me sulme.
“Anijet tregtare që synojnë të kalojnë nëpër ngushticë do të duhet të koordinohen me forcat e armatosura iraniane”, deklaroi komandanti i komandës qendrore ushtarake, Ali Abdollahi Aliabadi.
Çmimet e naftës u rritën pasi tregtarët shfaqin dyshime për funksionimin e planit amerikan.
Bisedimet mes Uashingtonit dhe Teheranit për përfundimin e luftës konsiderohen të bllokuara.
Javën e kaluar, çmimi i naftës u rrit mbi 126 dollarë për fuçi – niveli më i lartë që nga viti 2022, kur Rusia nisi pushtimin e saj të plotë të Ukrainës. //a.i/