FOKUS – Edhe Portugalia gati të njoftojë njohjen e shtetit palestinez
LISBONË, 21 shtator /ATSH-AFP-ANSA/ – Ministria e Punëve të Jashtme e Portugalisë konfirmoi se Portugalia do ta “njohë shtetin e Palestinës” të dielën, më 21 shtator.
Në fund të korrikut, Lisbona njoftoi këtë masë, veçanërisht në dritën e “zhvillimeve jashtëzakonisht shqetësuese në konflikt, si në nivel humanitar ashtu edhe për shkak të referencave të përsëritura për aneksimin e mundshëm të territoreve palestineze”.
Në një deklaratë të shkurtër, Ministria e Punëve të Jashtme e Portugalisë njoftoi se njohja zyrtare e shtetit të Palestinës nga Portugalia do të zhvillohet sot në Nju Jork në orën 15:15 (21:15 GMT).
Ceremonia do të zhvillohet në selinë e Misionit të Përhershëm të Portugalisë në Kombet e Bashkuara. Delegacioni portugez, në Nju Jork për Javën e Nivelit të Lartë të Asamblesë së Përgjithshme të OKB-së, përfshin ministrin e Jashtëm, Paulo Rangel dhe do të udhëhiqet nga presidenti, Marcelo Rebelo de Sousa.
Edhe Mbretëria e Bashkuar do të njohë zyrtarisht sot pasdite shtetin e Palestinës, pavarësisht presionit të fortë nga Shtetet e Bashkuara, sipas mediave britanike, BBC, Shoqata e Medias dhe ”The Guardian”.
Kryeministri britanik Keir Starmer njoftoi në korrik se vendi i tij do ta njihte një shtet palestinez në Asamblenë e Përgjithshme të OKB-së në shtator, nëse Izraeli nuk do të bënte një sërë angazhimesh, përfshirë një armëpushim në Rripin e Gazës.
Duke vënë re një situatë të përkeqësuar, kryeministri britanik pritet ta konfirmojë sot vendimin e tij, sipas BBC-së, Shoqatës së Medias dhe ”The Guardian”.
Keir Starmer deklaroi se kjo masë do të kontribuonte në një proces të vërtetë paqeje.
Në përgjigje, kryeministri izraelit Benjamin Netanyahu e akuzoi atë për shpërblimin e “terrorizmit monstruoz” dhe qetësimin e ideologjisë “xhihadiste”.
Kjo njohje vjen ndërsa Izraeli nisi një fushatë ushtarake tokësore dhe ajrore në Qytetin e Gazës, në veri të territorit palestinez, për të shkatërruar lëvizjen islamike palestineze Hamas./ a.jor.