Firmoset marrëveshja, RTSH do të transmetojë programe audiovizive në gjuhën italiane
TIRANË, 17 tetor /ATSH/ Radio Televizioni Shqiptar dhe Rai Com nënshkruan sot një marrëveshje për transmetimin e programeve të reja audiovizive në gjuhën italiane në Shqipëri.
Një sërë filmash, dokumentarësh, serish dhe programesh televizive italiane do të transmetohen së shpejti në ekranin e Radio Televizionit Shqiptar, pas marrëveshjes që Televizioni Publik Shqiptar nënshkroi me RAI-n, përgjatë harkut kohor të 12 muajve.
Marrëveshja u nënshkrua në Rezidencën e Italisë, nga zv/drejtoresha e RTSH-së, Aurora Polo dhe International Sales Manager i RAI Com, Margherita Zocaro.
Fabrizio Bucci, ambasador i Italisë në Shqipëri vlerësoi bashkëpunimin ndërsa theksoi faktin që gjuha italiane është mjaft e studiuar në Shqipëri.
“Rai është një industri e rëndësishme televizive sepse ajo nuk prodhon vetëm lajme dhe informacione, por edhe një sërë programesh për arsimin dhe sektorin e kulturës. Prandaj Rai është një element shumë i rëndësishëm për përhapjen e kulturës italiane. Në fakt gjuha italiane është një gjuhë mjaft e studiuar edhe në Shqipëri. Janë rreth 60 000 nxënës dhe studentë shqiptarë që studiojnë gjuhën italiane në çdo lloj niveli të arsimit. Madje ne kemi trefishuar edhe numrin e mësuesve të gjuhës italiane, nga 100 mësues, tashmë janë rreth 350 të tillë në Shqipëri”, tha Bucci.
Një lajm i mirë për dy vendet tona vjen nga Ministria e Ekonomisë, Kulturës dhe Inovacionit në Shqipëri, e cila lajmëroi hapjen e një muzeu që do të pasqyrojë bashkëpunimin e shkëlqyer mes Italisë dhe Shqipërisë ndër vite.
“Kjo marrëdhënie kaq e ngushtë mes Shqipërisë dhe Shqipërisë nuk mbetet thjesht tek këto marrëveshje pasi ne po njohim mundësinë për të krijuar një muze në Shqipëri që manifeston bashkëpunimin e shkëlqyer jo vetëm të këtyre viteve të fundit por të shumë viteve edhe më përpara, të artistëve shqiptarë që jetojnë në Itali, të artistëve Italinë që jetojnë në Shqipëri, gërmimeve arkeologjike të ndryshme. Kjo shkon edhe në promovimin e vlerave tona të përbashkëta kombëtare”, u shpreh zv. ministre e Ekonomisë, Kulturës dhe Inovacionit, Lira Pipa.
Ceremonia e nënshkrimit u zhvillua në prani të autoriteteve shqiptare të fushës së kulturës dhe arsimit, drejtorit të Institutit Italian të Kulturës, Alessandro Ruggera si edhe të personaliteteve të tjera, të ftuar të ambasadorit të Italisë, Fabrizio Bucci.
Dy vjet më parë mes dy televizioneve publike është nënshkruar një marrëveshje mirëkuptimi për një bashkëpunim sa më të ngushtë në fushën e përhapjes së gjuhës dhe kulturës italiane në Shqipëri.
Veprimtaria përkoi me kremtimet e edicionit XXIV të Javës së Gjuhës Italiane në Botë 2024.
Nënshkrim i marrëveshjes mes RAI Com dhe RTSH-së Foto: Florjan Abazaj 1 nga 12/r.e/a.f/