Gjirokastra nën tingujt e kitarës, 17-vjeçari Erind Bajo luan në rrugët e kalldrëmta

Këtë verë e gjen çdo mbrëmje në pazarin karakteristik të Gjirokastrës. Me kitarën e tij Erind Bajo e mbush këtë pikë takimi të të gjithë vizitorëve me tinguj muzikorë që herë pas here i shoqëron edhe duke kënduar.

Si nxënës i liceut artistik, “Jordan Misja” ai është i fokusuar te muzika klasike, por së fundi ai ka filluar të interpretojë dhe atë moderne, nxitur nga xhaxhai i tij skulptori i njohur Arben Bajo.

“Mundohem të sjell të gjitha rrymat, më së shumti moderne, klasike, por edhe ato shqip. Xhaxhi më ka mbështetur në këtë rrugëtim”, tha Bajo.

17-vjeçari është njohës i mirë edhe i instrumenteve të tjerë, ndërkohë që ëndrrat e tij sigurisht lidhen vetëm me muzikën.

“Luaj violinë, piano, firzamonikë dhe këndoj. Në plan kam të krijoj grupin tim”, tha ai.

Pjesëmarrës në shumë kompeticione muzikore, fitues i disa çmimeve ndërkombëtare Erind Bajo është talenti premtues i instrumentistëve shqiptarë.

/rtsh.al/