Izraeli: Trupat e vrarë të pesë pengjeve janë gjetur nga Gaza
Forcat izraelite kanë gjetur trupat e pajetë të pesë pengjeve të cilët u vranë në sulmet e 7 tetorit nga Hamasi. Trupat u gjetën në Khan Yunnis ndërsa janë identifikuar si 56 vjeçarja Maya Goren, e cila ishte me profesion mësuese si dhe 4 ushtarë :33 vjeçari Oren Goldin, 51 vjeçari Ravid Gatz, 19 vjeçari Kirill Brodsky dhe 20 vjeçari Tomer Yakiv Ahimas.
Marrja në pyetje e militantëve të kapur të Hamasit i lejoi trupat e ushtrisë izraelite të afroheshin në zonë ku dhe u gjetën trupat e pajetë. Ndërsa luftimet vijojnë në Rripin e Gazës një zyrtar izraelit ka bërë me dije se një delegacion i Tel Avivit do të marrë pjesë në bisedime për të siguruar një armëpushim dhe lirimin e pengjeve . Bisedimet po ndërmjetësohen nga Shtetet e Bashkuara, Egjipti dhe Katari .
Ndërsa kryeministri izraelit Benjamin Netanyahu pritet të takohet këtë të enjte me presidentin amerikan Biden. Fokusi i diskutimeve do të jetë gjetja e një zgjidhjeje për ti dhënë fund luftës në Gaza. Në një fjalim në Kongresin e SHBA një ditë më parë, Netanyahu tha se qeveria e tij ishte e angazhuar në mënyrë aktive në përpjekjet intensive për lirimin e pengjeve të mbetur në Rripin e Gazës./vizionplus.tv