KOMENT – Liderët evropianë konsultohen me Trump nga Tirana, bien dakord për një përgjigje të përbashkët ndaj Rusisë

TIRANË, 16 maj /ATSH/- Udhëheqësit evropianë ranë dakord sot për të vazhduar me veprime të përbashkëta kundër Rusisë – pas dështimit të negociatave për të rënë dakord për një armëpushim në Ukrainë, tha sot kryeministri britanik, Keir Starmer, pas konsultimeve me presidentin e SHBA-së, Donald Trump, sipas AP.

Starmer foli nga kryeqyteti i Shqipërisë, Tirana, ku udhëheqësit e dhjetëra vendeve evropiane u mblodhën për samitin e Komunitetit Politik Evropian (EPC), ku mori pjesë presidenti ukrainas, Volodymyr Zelensky.

“Zhvillova një takim me presidentin Zelensky dhe më pas një telefonatë me presidentin Trump – ku diskutuam zhvillimet e negociatave të paqes, dhe qëndrimi rus është qartësisht i papranueshëm”, u tha Starmer gazetarëve.

“Si rezultat i takimit me presidentin Zelensky, diskutimit me presidentin Trump, ne tani po përafrojmë dhe koordinojmë nga afër përgjigjet tona”, tha ai.

Starmer tha se ai dhe udhëheqësit e Francës, Gjermanisë dhe Polonisë ishin konsultuar me Trump.

Ai nuk tha se çfarë mund të përfshijë përgjigja, por disa udhëheqës evropianë kërkuan sanksione të reja.

Bashkimi Evropian ka të ngjarë të miratojë një raund të ri masash të martën.

Rusia dhe Ukraina zhvilluan sot bisedimet e tyre të para të drejtpërdrejta për paqe – që nga pushtimi i plotë i Moskës – i cili filloi më 24 shkurt 2022.

“Bisedimet, të cilat u zhvilluan sot në Turqi, përfunduan pas më pak se dy orësh”, sipas Ministrisë së Jashtme turke dhe një zyrtari ukrainas.

Presidenti francez, Emmanuel Macron tha se ishte e papranueshme që, për herë të dytë, Rusia nuk u ishte përgjigjur kërkesave të bëra nga amerikanët, të mbështetura nga Ukraina dhe evropianët.

“Asnjë armëpushim, dhe për këtë arsye asnjë takim në nivel vendimmarrjeje. Dhe asnjë përgjigje”, tha ai.

“Ne do të vazhdojmë të koordinohemi me partnerët tanë evropianë – koalicionin e të gatshëmve – dhe Shtetet e Bashkuara të Amerikës. Do të ketë kontakte dhe reagime të reja në orët në vijim”, shtoi Macron.

“Përpjekjet diplomatike që kemi bërë deri më tani për fat të keq kanë dështuar për shkak të mungesës së gatishmërisë së Rusisë për të ndërmarrë hapat e parë në drejtimin e duhur”, tha kancelari gjerman, Friedrich Merz.

“Por, ne nuk do të dorëzohemi, ne do të vazhdojmë dhe do të koordinohemi në anën evropiane, së bashku me amerikanët”, tha Merz.

Bota duhet të përgjigjet

Më herët, Zelensky tha se Ukraina ishte e përkushtuar për t’i dhënë fund luftës, por u kërkoi udhëheqësve evropianë të rrisnin sanksionet nëse presidenti rus, Vladimir Putin vazhdonte të luante me kohën – në bisedimet që synojnë sigurimin e një armëpushimi.

“Ukraina është gati të ndërmarrë të gjitha hapat për t’i dhënë fund kësaj lufte”, tha Zelensky.

Por, nëse rezulton se delegacioni rus është vërtet thjesht teatral dhe nuk mund të japë asnjë rezultat sot, bota duhet të përgjigjet. Ky reagim, duhet të përfshijë sanksione kundër sektorit të energjisë dhe bankave të Rusisë”, tha ai.

Putini bëri gabim

Deklarata e Zelensky erdhi pasi Putin refuzoi të merrte pjesë në bisedimet ballë për ballë në Stamboll.

“Mendoj se Putini bëri një gabim duke dërguar një delegacion të nivelit të ulët”, tha sekretari i përgjithshëm i NATO-s, Mark Rutte ndërsa mbërriti në samitin e Komunitetit Politik Evropian (EPC), në Tiranë.

“Topi është qartësisht në fushën e tij. Ai duhet të luajë me topin. Ai duhet të jetë serioz në lidhje me dëshirën për paqe”, shtoi ai.

Presidentja e Komisionit Evropian, Ursula von der Leyen tha se ishte e qartë se presidenti Zelensky ishte gati të takohej, por presidenti Putin nuk u shfaq kurrë, dhe kjo tregonte besimin e tij të vërtetë.

“Kështu që ne do ta rrisim presionin”, tha Von der Leyen.

Von der Leyen tha se BE-ja po planifikonte një paketë të re sanksionesh.

Ajo tha se masat do të synonin “flotën hije” të anijeve të vjetra të mallrave që Rusia po përdor për të anashkaluar sanksionet ndërkombëtare dhe konsorciumin e gazsjellësit “Nord Stream”.

“Sektori financiar i Rusisë do të jetë gjithashtu në shënjestër”, tha ajo.

Të dërguarit e BE-së kanë punuar për paketën e re të sanksioneve për disa javë, dhe ministrat e Jashtëm të bllokut mund t’i miratojnë ato të martën.

Kryeministrja italiane, Giorgia Meloni theksoi se përpjekjet për të arritur një marrëveshje për paqen në Ukrainë duhej të vazhdonin.

“Mendoj … se nuk duhet të dorëzohemi. Mendoj se duhet të këmbëngulim, duhet të këmbëngulim për një armëpushim pa kushte dhe një marrëveshje serioze paqeje që përfshin garanci sigurie për Ukrainën”, tha ajo. //a.i/