Komisioni Evropian reagon pas sulmit kibernetik ndaj frigoriferëve të supermarketeve
Një valë e re sulmesh kibernetike ka goditur sistemet e ftohjes në qindra supermarkete në disa vende të Bashkimit Evropian, duke shkaktuar probleme me frigoriferët dhe ngrirësit e produkteve ushqimore.
Komisioni Evropian ka paralajmëruar se këto incidente tregojnë se kërcënimet kibernetike mund të ndikojnë drejtpërdrejt në jetën e përditshme të qytetarëve, duke ndërprerë shërbimet dhe duke shkaktuar dëme për bizneset.
Sipas raportimeve, probleme janë evidentuar në Belgjikë, Luksemburg, Suedi, Danimarkë dhe Irlandë. Qindra dyqane kanë raportuar ndërprerje ose keqfunksionime të sistemeve të ftohjes pas incidenteve të sigurisë kibernetike.
Kompanitë Ahold Delhaize dhe Colruyt kanë konfirmuar se incidentet e lidhura me sistemet e informacionit kanë prekur frigoriferët dhe ngrirësit në dhjetëra dyqane në Belgjikë dhe Luksemburg. Probleme të ngjashme janë raportuar edhe nga zinxhirët suedezë ICA dhe Coop.
Edhe IKEA ka bërë të ditur se një prej dyqaneve të saj në Belgjikë është prekur nga sulmet, ndërsa nuk përjashton mundësinë që të jenë shënjestruar edhe pika të tjera të rrjetit.
Ndërkohë, kompania daneze e inxhinierisë Danfoss ka konfirmuar se produktet e saj janë prekur nga incidentet. Në Irlandë, zinxhiri i supermarketeve SuperValu ka raportuar probleme me sistemet e ftohjes në 13 nga 223 dyqanet e tij.
Komisioneri Evropian për Bujqësinë dhe Ushqimin, Christoph Hansen, i ka cilësuar këto sulme si një përpjekje për të ndërprerë furnizimin me ushqime.
Autoritetet belge kanë nisur një hetim penal për të zbardhur rrethanat e sulmit dhe për të identifikuar përgjegjësit.
Këto incidente vijnë vetëm pak javë pas një sulmi të ngjashëm në Francë, ku, sipas raportimeve, hakerat morën kontrollin e sistemeve të ftohjes në qindra supermarkete. Temperaturat në disa njësi arritën deri në 50 gradë Celsius, duke shkaktuar zjarre dhe shkatërrimin e sasive të mëdha të ushqimeve.
Ngjarjet e fundit kanë shtuar shqetësimet në Bashkimin Evropian për cenueshmërinë e infrastrukturës kritike dhe ndikimin që sulmet kibernetike mund të kenë në sigurinë ushqimore dhe shërbimet jetike.
Mos rri jashtë: bashkohu me ABC News. Ne jemi kudo!