Komisioni i Ekonomisë, kalon paketa “Inovacion”, miratohet marrëveshja strategjike me Italinë dhe mbrojtja e patentave

Komisioni për Ekonominë, Punësimin dhe Financat, nën drejtimin e kryetares Milva Ekonomi, i dha sot dritën jeshile një pakete ligjore që synon forcimin e bashkëpunimit ndërkombëtar dhe mbrojtjen e inovacioneve. Në fokus ishin marrëdhëniet me Italinë dhe rregullat e reja për pronësinë intelektuale.

Pakti i gjerë me Italinë

Komisioni miratoi ratifikimin e marrëveshjes kuadër për bashkëpunim strategjik me Italinë. Zv.ministri i Ekonomisë, Enkelejd Musabelliu, sqaroi se ky pakt shkon përtej çështjeve të ditës, duke mbuluar sektorë vitalë si energjia, mjedisi, industria e mbrojtjes, shëndetësia dhe inovacioni.

Musabelliu garantoi deputetët se marrëveshja respekton plotësisht rregullat e tregut.

“Marrëveshja nuk parashikon trajtim preferencial, por zbatimin e plotë të rregullave të konkurrencës dhe prokurimit publik sipas legjislacionit shqiptar dhe atij europian,” theksoi zv.ministri.

Patenta për traditën dhe gjenetikën

Një tjetër ligj i rëndësishëm që kaloi ishte ai për aderimin e Shqipërisë në Traktatin e Gjenevës (2024). Prezantuar nga zv.ministri Martin Kajo, ky ligj vendos një standard të ri për patentat: detyrimin për të treguar origjinën e burimeve gjenetike.

Kjo do të thotë se shpikjet që bazohen në pasuritë biologjike apo njohuritë tradicionale shqiptare do të jenë të dokumentuara dhe të mbrojtura ligjërisht, duke rritur transparencën në sistemin e patentave.

Standardet në CEFTA

Gjithashtu, komisioni miratoi vendimin për aspektet tregtare të pronësisë intelektuale në kuadër të CEFTA-s, duke synuar harmonizimin e rregullave të mbrojtjes së markave dhe shpikjeve me vendet e rajonit për të nxitur tregtinë e lirë.

Të tre projektligjet u miratuan në parim, nen për nen dhe në tërësi, duke u përcjellë për votim final në seancën plenare të radhës.

/rtsh.al/